- Администрацијата на Доналд Трамп го објави првиот пакет од декласифицирани досиеја за неидентификувани феномени и летечеки објекти и најави дека ќе продолжи да објавува нови документи на секои неколку недели. Досиејата се достапни на официјалната владина веб-страница.
- Првиот пакет опфаќа 162 датотеки од ФБИ – случаи за кои немало дефинитивно објаснување за феномените. Притоа се поттикнуваат јавноста и приватниот сектор да ги анализираат и да понудат одговори.
- Документите содржат фотографии од мисиите Аполо 12 и Аполо 17 на Месечината, транскрипт од астронаути што опишуваат „блескави честички“ што се движат со голема брзина, како и фотографии снимени од Земјата и од авиони. Нема, барем во првиот пакет, никакви фотографии, снимки или транскрипти за вонземјани.
- Пензионираниот американски полковник Џон Александер, кој лично истражувал феномени на НЛО, вели дека објавените документи не се важни и смета дека целта на нивното објавување е да се пренасочи вниманието од потешките теми, како војната против Иран.
- „Претпоставувам дека имаат илјадници и илјадници документи, од кои повеќето се исечоци од вести. Се сомневам дека ќе добиеме нешто блиску до одговор. Американците ќе бидат многу повеќе загрижени за цените на бензинот“, изјави Александер.
- Русија и Украина се согласиле со предлогот од Доналд Трамп за тридневен прекин на огнот, до понеделник на полноќ. Киев и Москва во текот на оваа недела објавија сопствени еднострани прекини на огнот и потоа меѓусебно се обвинија дека ги прекршиле.
- Трамп објави и дека двете земји ќе го искористат примирјето за да разменат по 1.000 воени заробеници и изрази надеж дека примирјето ќе трае и подолго од три дена.
- „Ова барање го упатив директно јас и многу го ценам договорот од претседателот Владимир Путин и претседателот Володимир Зеленски. Се надевам дека ова е почеток на крајот на една многу долга, смртоносна и тешка војна“, објави Трамп.
- Главната цел на примирјето е да се избегнат провокации за време на прославата на Денот на победата над фашизмот, која Русија традиционално ја одбележува со голема воена парада на Црвениот плоштад. Парадата годинава ќе биде без тенкови, ракети и тешка воена машинерија.
- Зеленски објави декрет со кој „се дозволува“ воената парада на Русија и се гарантира дека „украинското оружје нема да биде насочено кон Црвениот плоштад“. Русија предупреди дека на каков било обид на Украина да ја попречи парадата ќе возврати со масовен ракетен напад врз Киев.
- Корисниците на Инстаграм од денеска повеќе нема да можат да испраќаат заштитени приватни пораки. Исклучувањето на енкрипцијата „од крај до крај“ (E2EE) му овозможува пристап на Инстаграм до целата содржина на директните пораки, вклучувајќи слики, видеа и гласовни белешки.
- „Шифрираните пораки на Инстаграм повеќе нема да бидат поддржани по 8 мај 2026 година. Ако имате разговори засегнати од оваа промена, ќе видите упатства како да ги снимите“, соопшти матичната компанија Мета.
- Ова е голем пресврт во политиката на Мета, која ја застапуваше Е2ЕЕ како „златен стандард за приватност на корисниците“. Во 2023 година ја вгради во Фејсбук месинџер и ја направи опционална во Инстаграм, со план да ја направи стандардна.
- E2EE е стандарден систем во Signal, WhatsApp, Facebook Messenger, Apple's iMessage и Google Messages. Telegram го нуди како опција. X нуди сличен систем за директни пораки. Snapchat го користи за фотографии и видеа. Discord планира стандардни енкрипции на гласовни и видео повици. TikTok нема планови да ја воведе технологијата за директни пораки.
- Групи за заштита на деца долго време бараа да биде укината оваа најбезбедна форма на онлајн пораки, оценувајќи дека дозволува ширење на екстремна содржина онлајн без властите да можат да интервенираат. Затоа настрада приватноста.
- Викторија Бејнс, професорка по ИТ на колеџот Грешам, верува дека причината за одлуката е покомплексна. „Платформите ги монетизираат нашите комуникации, нашите објави, лајкови и пораки, за да можат да прикажуваат насочено рекламирање. И сè повеќе компании како Мета се фокусираат на обука на модели со ВИ за кои податоците за пораки можат да бидат исклучително вредни“, вели Бејнс.
