Вести › Набрзинка

Некој товарил 3 милиони евра во џеб од фасадата на Владата

7 февруари 2025

Основното јавно обвинителство за гонење организиран криминал и корупција поднесе обвинение против едно лице и обвинителен предлог против уште четири лица поради злоупотреби во реконструкцијата на владината фасада.
Направена е незаконска имотна корист од речиси 3 милиони евра.
Главниот обвинет е управител на градежна компанија кој ја добил зделката вредна 7,6 милиони евра, притоа понудил заеднички настап со три фирми само за да ја зголеми својата понудена вредност, но без намера тие навистина да учествуваат во изведбата и не пријавил подизведувачи на кои планирал да им отстапи дел од работите.
Второобвинетиот, поранешен директор на владина служба (се спомнува екс директорот на СОЗР, Васе Доневски) , не ја исполнил службената должност и не реагирал на очигледните неправилности во начинот на изведба а трето и четвртообвинетите, одговорни за надзор, не проверувале дали материјалите се во согласност со проектните барања.

извор

Еднаквост: Во 27 земји 0,1% e повеќе од 80%

3 октомври 2026

Концентрацијата на богатството кај мала група луѓе во 27 земји од светот го надминала нивото во кое 0,1% од возрасната популација поседуваат повеќе од најсиромашните 80% од жителите.
Јазот е најдлабок во Русија, а најмалку е изразен во Словачка.
Македонија според оваа класификација е меѓу земјите со порамномерна распределба на богатството.
Јужна Африка нуди впечатлив пример за тоа колку можат да бидат трајни овие разлики. Студија што го опфаќа периодот од 1993 до 2017 година покажа дека немало трајно намалување на нееднаквоста во богатството по крајот на апартхејдот.

извор

„Лукоил“ ќе заврши кај партнери на Кушнер и Виткоф

3 октомври 2026

Разговорите на администрацијата на Трамп со Русија за крај на војната во Украина се проширија со нафтен договор вреден повеќе милијарди долари, од кој би профитирале деловни луѓе од Блискиот Исток поврзани со двајцата главни американски преговарачи, Стив Виткоф и Џаред Кушнер.
Договорот се однесува на голем број нафтени полиња, рафинерии и бензински пумпи ширум светот во сопственост на „Лукоил“, една од најголемите руски енергетски компании.
Откако администрацијата на Трамп лани воведе санкции против „Лукоил“, компанијата реши да го продаде својот имот во странство. Министерството за финансии на САД дисквалификува неколку потенцијални купувачи на „Лукоил“.
Сега е договорено имотот да биде продаден на група во која учествува инвеститорот Тод Боли, кој донирал 2 милиони долари за политичките цели на претседателот Трамп, на две групи од Блискиот Исток кои соработувале со Кушнер или Виткоф, како и еден огранок на американската влада.
На средбата со Виткоф и Кушнер во Кремљ на 5 септември, Путин предложил договорот да се реализира „како начин да им се покаже на Русите дека можат да соработуваат со САД“. Виткоф и Кушнер имале директна улога во преговарањето за финансиските услови, за да се обезбеди „значителна авансна исплата и удел за САД во добивката“, пишува Њујорк тајмс.

извор