- Глобалните трошоци за центри за податоци би можеле да достигнат 31.600 милијарди долари до 2050 година, за да се задоволи растечкиот апетит во светот за ВИ, проценува ревизорската куќа PricewaterhouseCoopers. Ако развојот на ВИ се забрза, сумата може да достигне 50.000 милијарди долари.
- За споредба: БДП на САД е околу 30.000 милијарди долари.
- САД, со 15.100 милијарди долари, ќе учествуваат со речиси половина од проектираните инвестиции. Следат регионот на Азија и Пацификот со 8.200 милијарди, Европа со 5.600 милијарди, Блискиот Исток со 1.100 милијарди и Африка со 255 милијарди долари, наведува PwC.
- Изградбата на центрите е еднократна инвестиција, но најголем дел од трошоците ќе биде за надградба и замена на чиповите, серверите, системите за складирање и другиот хардвер.
- „Железници. Електрификација. Интернет. Сите бараа огромни количини на капитал и дефинираа ера. Циклусот на инфраструктура на ВИ ги надминува сите три, се ресетира на секои четири до шест години и не му се гледа крајот“, се истакнува во извештајот.
- Прогнозата зависи од тоа колку брзо може да се воспостави сигурно снабдување со електрична енергија за центрите, како и од отпорот на јавноста. Најмалку 75 проекти, во вкупна вредност од околу 130 милијарди долари, беа блокирани или одложени поради спротивставување на локални власти во текот на првите три месеци од оваа година.
- Иран им понудил на САД нов предлог со кој се овозможува продолжување на преговорите за крај на војната и отворање на Ормускиот проток.
- Министерот за надворешни работи Абас Арагчи не наведе детали за планот, но забележа дека се надоврзува на Меморандумот за разбирање, потпишан во јуни од претседателите Трамп и Пезешкијан. Ниту една страна не го почитуваше потпишаното.
- „Ако се исполнат одредени услови... теснецот ќе биде отворен во рок од седум дена. Иран и САД би ги продолжиле преговорите за конечен договор“, изјави Арагчи.
- Трамп во средата од говорницата на ОН му се закани на Иран дека „ќе го испрати во пеколот“ и го обвини Техеран дека намерно ги одложува преговорите додека не поминат изборите за Конгресот на САД во ноември, на кои се очекува републиканците да го изгубат мнозинството.
- Арагчи одговори дека на иранските власти не им се брза. „Би било многу подобро да го прифатат пред изборите, но одлуката зависи од американската администрација. Планот е многу јасен. Веќе следниот ден од моментот кога САД ќе го прифатат, може да почне предвидениот распоред, а по седум дена, теснецот ќе биде отворен“, изјави Арагчи.
- Канадскиот премиер Марк Карни „внимателно го разгледувал“ и екстремното сценарио за американска воена инвазија врз неговата земја, откако претседателот Доналд Трамп почна да говори за Канада како 51-ва американска држава.
- „На оваа позиција имате одговорност да ги разгледате екстремните ризици, колку и да се малку веројатни. Тоа е едноставно управување со ризик. Не е основно сценарио, но би било неодговорно да не се подготвите за такво нешто“, изјави Карни во интервју за Њујорк тајмс.
- Премиерот не прецизираше што точно истражувала неговата влада ниту какви подготовки биле направени.
- И покрај несогласувањата, Карни вели дека често разговара со Трамп и сè уште гледа можност за продолжување на блокираните трговски преговори со САД.
- „Имаме добар однос во смисла на тоа дека можеме да се слушнеме и да разговараме за одредени прашања. Тој е директен. И јас сум директен. Така е многу поефикасно и знаеме дека тоа ќе продолжи“, изјави Карни.
