Вести › Набрзинка

МНР ќе плати 960 илјади евра за изнајмување коли за Самитот на ОБСЕ

6 ноември 2023

Според Бујар Османи, организацијата на завршниот самит на ОБСЕ во Скопје ќе чини помеѓу пет и осум милиони евра, а речиси целата сума ќе ја плати Македонија како претседавач.
МНР ќе плати 960 илјади евра за изнајмување на возила наменети за министрите за надворешни работи на земјите членки на ОБСЕ. Договорот е склучен со компанијата „АБЦ Рент а кар ДООЕЛ Скопје“, како единствен понудувач на огласот.
И Сергеј Лавров побарал да се обезбедат услови за негово присуство на самитот ама Османи вика дека таквото барање (на кое Русија има право), има предизвици бидејќи воздушниот простор e затворен за руски авиони.
„Нема пари за лекови за пациентите со цистична фиброза, нема пари за дијабетичарите и онколошките пациенти, нема пари за реагенси и нови методи во микробиологијата, што ќе придонесат за порано откривање на сериозни, живото-загрозувачки фунгални инфекции кај најтешките болни, нема пари за наука, за истражувања, нема пари за да купиме медицински, анатомски столици за работните места, со кои ќе му го продолжиме векот на нашиот р'бетен столб... списокот е долг, за што сè немаме пари....ама затоа МНР има пари за да плати 960 илјади евра за наем на возила за самитот на ОБСЕ. Зар е можно ова? Зар е вистина??? За сè нема пари, ама за луксуз имаме....пред кого презентираме некое квази високо ниво? Има ли крај на неконтролираното и непланско трошење на парите во оваа држава? Како е можно досега да не се појави некој политичар, па да рече, од утре ќе функционираме поинаку, ќе тераме со есап!?, пишуваат граѓани по социјални мрежи.
За државата да заштеди еден милион евра, пеесетина почесни конзули во Македонија понудија да ги позајмат своите дипломатски возила за потребите на МНР за време на самитот на ОБСЕ што ќе се одржи во Скопје.

извор

Протестен марш на ССМ за повисоки плати

14 март 2026

Сојузот на синдикатите денеска одржа протестен марш со барање за минимална плата од 600 евра и линеарно зголемување на платите за 100 евра.
Претседателот на ССМ Слободан Трендафилов го отфрла законското усогласување од 1.667 денари, бидејќи усогласувањето не го покрива растот на трошоците за живот - во последните два месеца вредноста на синдикалната минимална кошница пораснала за 2.000 денари.
Тој додаде дека 160.000 работници во земјава примаат плата која е под прагот на сиромаштија.
„Сметаме дека за март мора да се зголеми минималната плата затоа што работниците заработуваат многу повеќе отколку што ги плаќаат“, порача Трендафилов. Минималната плата, односно таа што ќе се исплати во април, по годишното усогласување, е 26.000 денари и не ја достигнува вредноста ниту до 500 евра.
ССМ останува на најавата за 24-часовен генерален штрајк, кој овој пат ќе го опфати и приватниот сектор.

извор

Мицкоски: Институциите се должни да обезбедат правда за трагедијата во Кочани

14 март 2026

„Постојат настани во историјата на една држава кои не се мерат со време, туку со болката што ја оставаат зад себе. Трагедијата во Кочани е еден од тие настани. Таа беше трагедија на еден град, но и трагедија која ја потресе целата наша држава и која засекогаш ќе остане врежана во колективното сеќавање“, порача премиерот Христијан Мицкоски на „Меѓународната конференција за институционалните и клиничките аспекти и решенија по пожарот во Кочани“.
„Семејствата имаат право да знаат како се случила трагедијата. А институциите имаат должност да обезбедат правда. Токму затоа, веднаш по трагедијата започна процес на институционално утврдување на фактите и на одговорноста. Овој процес мора да биде темелен, професионален и ослободен од било каков притисок. Во прашање се човечки животи, а во такви ситуации институциите мора да работат со највисоко ниво на сериозност и интегритет. Правдата не е прашање на политика. Таа е прашање на доверба во институциите, додаде Мицкоски.
Министерот за здравство Азир Алиу им изрази благодарност до повеќе од 400 здравствени работници од јавниот и приватниот сектор, кои со исклучителна пожртвуваност, концентрација и професионализам извршиле натчовечки напори да спасат животи“.
Алиу изрази благодарност и до медицинските тимови во европските здравствени центри: „Меѓународната солидарност потврди дека стручноста и хуманоста немаат граници кога се спасуваат човечки животи“.
Во пожарот во ноќниот клуб „Пулс“ во Кочани на 16 март 2025 година по полноќ загинаа 63 млади луѓе, а над 200 беа повредени.
Во нивна чест, во Паркот на револуцијата во Кочани задутре ќе бидат поставени симболичната инсталација „63 бели столчиња – 63 животи“, и муралот „Ѕид на сеќавање“.