Вести › Набрзинка

Лукровски оздраве, Стевчо се разболе

1 јули 2026

Градоначалникот на Општина Карпош, Сотир Лукровски, кој два месеца не одеше на работа, јавно откри дека имал здравствен проблем и дека изминатиот период за него бил големо искушение.

„Се соочив со здравствен предизвик кој ме натера да сфатам дека вистинската сила не е никогаш да не паднеш, туку секогаш да најдеш сила повторно да станеш“, соопшти Лукровски кој му заблагодари на премиерот Мицкоски „за човечноста, поддршката и помошта во мојата борба“.
„Само оние кои недоволно ме познаваат може да поверуваат дека сум се откажал. Сега по божја волја се враќам со нова енергија, со уште поголема посветеност и со јасна цел – да продолжам да работам одговорно, чесно и посветено, во интерес на граѓаните и развојот на нашата општина. Да сте ми живи и здрави“, напиша Лукровски на социјалните мрежи.
Ден претходно се дозна дека поранешниот градоначалник на Општина Карпош, Стевчо Јакимовски, на 2 јули нема да почне со издржување на едногодишната затворска казна, откако му било одобрено одложување поради здравствени причини.

извор

Укинат имунитетот од одговорност за вакцините против ковид

1 јули 2026

Три години по крајот на вонредната состојба поради пандемијата на коронавирусот во САД, министерот за здравство Роберт Кенеди Јуниор ја укина заштитата од одговорност за вакцини за ковид, медицински третмани и услуги: „Повеќе не постојат околности што оправдуваат итна употреба на лекови и биолошки производи“.
Во почетокот на 2020 година Министерството за здравство на САД издаде вонредни декларации за заштита на одговорност, за да се забрзаат иницијативите против пандемијата на ковид. На регулаторните тела им беше овозможено да издаваат вонредни овластувања со понизок праг на докажување од редовниот процес. Тоа им обезбеди широк имунитет на производителите и на медицинските лица што ги администрираа вакцините.
Декларациите беа продолжени повеќе пати. Иако вонредната состојба за јавното здравје поради ковид-19 заврши во мај 2023 година, во 2024 година тогашниот министер за здравство Ксавиер Бесера ја продолжи нивната важност до крајот на 2029 година. „Ковид продолжува да претставува реален ризик од идна вонредна состојба за јавното здравје. Одржувањето на заштитата е неопходно за да се подготват САД за таа закана“, соопшти Бeсера.
Со известувањето за прекинување, министерот Кенеди им остави „разумен временски период од една година на компаниите да се прилагодат на мерката. Декларациите за вакцини и лекови против ковид ќе престанат да важат на 29 јуни 2027 година. Декларациите за медицински помагала, како тестовите за ковид, ќе останат на сила само 180 дена, до 26 декември 2026 година.

извор

Владата на ремонт

1 јули 2026

ВМРО-ДПМНЕ со владината реконструкција ги добива министерствата за здравство и за социјална политика демографија и млади. За министер за здравство партијата го предлага актуелниот директор на Фондот за здравствено осигурување (ФЗО), Сашо Клековски, а за социјална политика, демографија и млади е предложен актуелниот заменик-министер во овој ресор, Ѓоко Велковски.
На местото на Клековски во ФЗО ќе биде назначен актуелниот министер за локална самоуправа од редовите на ВМРО-ДПМНЕ, Златко Перински, а за нов министер за локална самоуправа се предлага актуелниот вицепремиер и министер за односи меѓу заедниците Иван Стоилковиќ.
На партијата Влен ќе ѝ припаднат Министерството за правда, Министерството за култура и туризам и Министерството за односи меѓу заедниците, додека движењето ЗНАМ ќе номинира свој кандидат за министер во ресорот Земјоделство, шумарство и водостопанство. Свое учество во Владата ќе земе и Демократската партија на Турците, која ќе има министерско место без ресор.
Ресорот за добро владеење во рамки на Владата ќе биде укинат и ќе биде директно под ингеренции на кабинетот на премиерот.

извор