- Камала Харис не се откажува од амбицијата да биде претседателка на САД и планира да се кандидира на изборите во 2028 година.
- Вината за убедливиот пораз од Доналд Трамп на изборите лани таа ја префрла врз својот поранешен шеф Џо Бајден, поради тоа што не отстапил порано од трката. Потпретседателката Харис го замени Бајден како кандидат на демократите дури во август, три месеци пред гласањето.
- „Моите внуки во својот живот ќе дочекаат САД да имаат претседателка“, изјави Харис во интервју за ББЦ. На прашањето дали таа ќе биде првата, одговорила „Веројатно. Не сум уште готова. Целата кариера ја посветив на службата и таа ми е во коските“.
- На забелешката дека слабо котира на анкетите и дека дури и холивудскиот актер Двејн „Рок“ Џонсон има повисок рејтинг од неа, Камала вели дека не им верува на анкетите.
- „Кога Камала Харис катастрофално беше поразена на изборите, таа требаше да ја разбере пораката. На Американците не им е гајле за нејзините апсурдни лаги“, коментираше Ебигејл Џексон, портпаролката на Белата куќа.
- Од британски затвор по грешка бил ослободен етиопски имигрант осуден поради сексуален напад врз 14-годишно девојче – злосторство што во јули ја вознемири цела Британија и предизвика бран масовни антиимигрантски протести.
- Наместо да го спроведат во имигрантски притвор пред да го депортираат во Етиопија, чуварите од затворот Челмсфорд го пуштиле на слобода 38-годишниот Хадуш Гебресеиласие Кебату. Му дале и 76 фунти за да ги покрие основните трошоци една недела. Неколку часа подоцна бил забележан на улица во затворската тренерка како прашува луѓе за насока, а потоа се качил на воз за Лондон. Полицијата денеска организира масовна потрага.
- „Нема оправдување. Згрозен сум и бесен поради тоа што осуден сексуален злосторник слободно се шета по Лондон“, изјави министерот за правда Дејвид Лами. „Овој човек мора да биде фатен и депортиран за неговите злосторства“, додаде премиерот Кир Стармер.
- Само една недела откако со чамец нелегално пристигнал во Англија, Кебату во јули сексуално нападнал девојче во местото Епинг, а потоа и друга жена што сакала да го спречи. Овој напад поттикна илјадници луѓе да протестираат во хотелот во кој биле префрлени азилантите во Епинг, а потоа и во други градови. Демонстрациите прераснаа во нереди, а беа организирани и контрапротести.
- Закон усвоен во јуни го намали од 50% на 30% времето што странските криминалци мора да го поминат во затвор пред да бидат депортирани од Британија. Кебату отслужил 30% од својата казна. Поради погрешно толкување на ова правило, лани од британски затвори биле пуштени 37 криминалци. Во 2023-2024 година по грешка биле ослободени 87, а во 2022 година 71.
- Израел категорично се спротивставува Турција да биде исклучена во меѓународниот контингент од 5.000 војници, кој треба да го разоружи Хамас и да го одржува редот во Газа пред да биде формирана преодната влада. Турција е еден од гарантите на договорот за прекин на огнот, но Израел го смета претседателот Реџеп Таип Ердоган за премногу близок до групата Муслиманско братство и до Хамас.
- Силите веројатно ќе бидат предводени од Египет, во тесна соработка со САД преку Цивилно-воен координативен центар (ЦМКЦ) во јужниот израелски град Кирјат Гат. Овој центар, промовиран во вторникот од американскиот потпретседател Џеј Ди Венс, ќе го координира доставувањето помош за Газа. Според планот за прекин на огнот, во Газа треба да влегуваат по 600 камиони со помош дневно. Од потпишувањето, влегуваат просечно по 89.
- Некои учесници во контингентот, како Индонезија и Обединетите Арапски Емирати, инсистираат меѓународните сили да добијат и мандат од Советот за безбедност од Обединетите нации, иако мисијата нема врска со ОН.
- Американскиот државен секретар Марко Рубио изјави дека во мисијата нема да има улога за Агенцијата на ОН за помош на Палестинците (УРНВА) затоа што е „подружница на Хамас“.
