Вести › Набрзинка

Израел уби пет новинари во последователен напад на болница

25 август 2025

Израел ја бомбардираше главната болница во јужна Газа а нешто подоцна повторно удри на истото место додека таму беа спасувачи и новинари за да им помогнат на повредените.
Загинаа најмалку 20 лица, вклучувајќи пет новинари, соопштија здравствените власти.
Првиот напад го погоди горниот кат од зградата во болницата Насер, при што загинаа новинарот на Ројтерс Хусам ал-Масри и други. Потоа новинарите и спасувачите се упатија кон местото на настанот за да им помогнат на ранетите, кога втора бомба го погоди истото место 15 минути подоцна.
Снимка на AlGhad TV која одеше во живо јасно покажува што се случи:

Нападот го осудија САД, Франција, Велика Британија и поголем дел од светската јавност.
Според Комитетот за заштита на новинарите, од 7 октомври 2023 година се убиени најмалку 193 палестински новинари, повеќе од вкупниот број на новинарски жртви на глобално ниво во претходните три години.
Странски новинари и екипи Израел не пушта во Газа.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор