- Во пожар што избувна синоќа е уништена кулата на „Вјесник“ во Загреб, еден од култните објекти во градот. Нема жртви ниту повредени. Зградата со години е напуштена.
- „Сцените се ужасни. Огнот постојано се разгорува на различни катови. Причината не е позната, иако има сомневања. Тоа ќе го покаже истрагата. За жал, штетата е целосна“, изјави градоначалникот Томислав Томашевиќ.
- Нема итна опасност од уривање на зградата. Градежни инспектори ќе ја утврдат штетата и ќе решат дали кулата може да биде обновена или ќе треба да се сруши. Објектот е во сопственост на државата. Има канцелариски простории од 30.000 квадратни метри, кои со децении не биле реновирани.
- Изградена во 1972 година, модернистичката зграда беше еден од најпрепознатливите симболи на Загреб. Во неа, покрај „Вјесник“, своевремено беа и редакциите на „Вечерњи лист“ и на многу други весници, неделници и магазини. По приватизацијата и распадот на државното издаваштво, редакциите се иселиле.
- Кина обезбедува клучна поддршка за руската агресија во Украина и би можела да ја заврши војната со еден телефонски повик, изјави американскиот амбасадор во НАТО.
- „Пекинг би можел да му се јави на Владимир Путин и да ја заврши оваа војна утре, ако го прекине доставувањето технологии со двојна намена. Би можела и да престане да купува руска нафта и гас“, изјави амбасадорот Метју Витакер.
- Русија се потпира на Кина за набавка за критични делови и компоненти за беспилотни летала и друга воена опрема. Откако Европа воведе санкции за Москва, Кина стана и најголем увозник на руска нафта.
- Во јануари во кинеските пристаништа просечно пристигнувале по 1,65 милиони барели руска сурова нафта. Тоа е најмногу од март 2024 година и второ највисоко количество по инвазијата врз Украина пред четири години.
- Кинеското Министерство за надворешни работи ги отфрли како „целосно неосновани“ обвинувањата дека ги поддржува воените напори на Русија.
- Почина театарската, филмска и телевизиска глумица Ленче Делова, соопшти Драмски театар, нејзината матична куќа. Имаше 77 години.
- Нејзиниот талент, сценска присутност и човечка топлина оставија неизбришлива трага на сцената и во срцата на публиката. Со секоја улога таа внесуваше искреност, емоција и посветеност, градејќи ликови кои долго ќе се паметат. Нејзината насмевка и ведриот дух беа светлина зад сцената, а нејзината професионалност пример за генерации актери, напишаа колегите.
- Делова играла во 60-тина претстави во Драмски театар, а глумеше и во над 30 филмови.
