Вести › Набрзинка

Иран гаѓа танкери, нафтата скокна над 100 долари

12 март 2026

Цената на нафтата повторно се качи над 100 долари за барел откако Иран погоди два танкери и уште четири бродови во водите околу Ормускиот проток.
Танкерите биле запалени во ирачки води, откако во нив удриле бродови со експлозив. Уште четири товарни бродови биле погодени со проектили. Ирак итно ги затвори своите пристаништа.

Тоа предизвика нов скок на цената на нафтата, иако Меѓународната агенција за енергија објави дека ќе ослободи 400 милијарди барели нафта од резервите за вонредни ситуации – најмногу од кога било досега. Тоа количество е доволно за да ги задоволи потребите за околу 4 дена.
САД независно објавија дека ќе ослободат 172 милиони барели нафта од сопствените резерви од вкупно 415 милиони барели, за да ги стабилизираат цените на горивата на домашниот пазар. Ќе бидат потребни 120 дена за испораките.
Иран се закани дека нападите врз бродовите ќе продолжат. „Подгответе се нафта од 200 долари за барел, бидејќи цената на нафтата зависи од регионалната безбедност, која вие ја дестабилизиравте“, објави портпарол на иранската воена команда.
Доналд Трамп изјави дека Ормускиот проток е во „одлична состојба“, откако САД уништиле 58 брода на иранската воена морнарица: „Им ги уништивме сите бродови. Имаат некои проектили, ама не многу“.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор