- Наместо некого од бројните експерти и аналитичари, новинарите на белградско Време го прашале четботот што треба опозицијата во Србија да прави за да победи на следните избори.
- Ова се советите на вештачката интелигенција: единство, јасна порака и платформа, мобилизација на гласачкото тело, транспарантност и борба против корупцијата, квалитетни кадри, соработка со невладини организации, едукација на гласачите, креативна и ефикасна кампања, правна заштита на изборните права, подготвеност за преземање на власта.
- Кој извлече поука, извлече.
- Сенатот на САД усвои резолуција со која му наложува на претседателот Доналд Трамп да добие одобрение од Конгресот пред да ја продолжи војната во Иран.
- Идентична мерка беше усвоена и од Претставничкиот дом, но резолуцијата е во голема мера симболична, бидејќи нема сила на закон нема да му биде испратена на Трамп да ја потпише.
- Сепак, првото усвојување на резолуцијата по девет неуспешни гласања, сведочи дека Трамп ја губи поддршката од републиканските пратеници.
- Тоа може да се одрази на гласањето за барањето на Пентагон за уште 80 милијарди долари од буџетот за да се покријат трошоците од војната со Иран.
- Администрацијата на Трамп бара од Конгресот да одобри и буџет за одбрана од 1.500 милијарди долари за фискалната 2027 година, што е за 42% повеќе од сегашниот.
- Израелските безбедносните сили намерно ги таргетирале палестинските деца, со што се одговорни за геноцид, злосторства против човештвото и воени злосторства во Газа, како и воени злосторства на окупираниот Западен Брег, објави Независната меѓународна комисија на ОН.
- Најмалку 20.179 деца биле убиени помеѓу 7 октомври 2023 година до октомври 2025 година. Децата сочинуваат околу 30% од вкупниот број на жртви во Газа, се наведува во извештајот.
- Палестинските деца биле намерно убивани за време на војната, па дури и по октомври 2025 година, кога стапи на сила прекинот на огнот. Ова се посочува како доказ за „геноцидната намера на израелските власти и безбедносните сили да ја уништат палестинската група, целосно или делумно, во Газа“.
- Нападите врз здравствените установи ја намалиле стапката на преживување на новороденчињата и резултирале со зголемување на бројот на спонтаните абортуси. Речиси сите деца во Газа имаат потреба од психолошка поддршка.
- На Западниот Брег и Источен Ерусалим, Комисијата откри нагло зголемување на насилство од израелски доселеници врз палестински деца. Особено момчињата биле подложени на систематско малтретирање во притвор, присилно соблекување, тепање и лишување од храна.
- Претходен извештај на комисијата во септември откри дека Израел извршил геноцид во Газа и дека овие дела биле поттикнати од високи функционери, вклучувајќи го и премиерот Бенјамин Нетанјаху.
