- Француското Национално собрание изгласа закон за забрана на пристап до социјални медиуми за деца на возраст под 15 години.
- Законот опфаќа и забрана за користење на мобилни телефони во вишите средни училишта (lycée), за ученици на возраст од 15 до 18 години. Веќе важи за основните и за средните.
- Се очекува Сенатот да го одобри законот до февруари, за да стапи на сила од идната учебна година од 1 септември. Платформите ќе мораат до 31 декември да ги деактивират профилите на младите за кои важи забраната.
- Државниот регулатор за медиуми ќе состави список на „штетни“ социјални медиуми, кои ќе бидат забранети за лица под 15 години. На посебна листа ќе бидат наведени „помалку штетни страници“, кои ќе бидат достапни за деца со експлицитна согласност од родителите.
- За да може да се спроведува забраната, потребен е ефективен систем за проверка на возраста. На таков систем сега се работи на ниво на цела Европа.
- „Емоциите на нашите деца и тинејџери не се за продажба ниту за манипулација од американските платформи или од кинеските алгоритми“, порача претседателот Емануел Макрон.
- Европа не е способна да се одбрани без воена поддршка од САД, предупреди генералниот секретар на НАТО, отфрлајќи ги идеите дека Алијансата би можела да функционира и без најмоќната воена сила во светот.
- „Ако некој тука мисли дека Европската Унија или Европа како целина може да се одбрани без САД, нека продолжи да сонува. Не можете“, им порача Марк Руте на европратеници во Брисел. „Европа и САД имаат потреба едни од други“.
- Франција ги предводеше повиците Европа да изгради „стратешка автономија“ и доби поддршка откако администрацијата на Трамп лани отворено предупреди дека безбедносни приоритети на САД се на друго место и дека Европејците ќе мораат самите да се грижат за себе.
- На самитот на НАТО во јули, европските сојузници (со исклучок на Шпанија) го прифатија барањето на Трамп да трошат 3,5% од својот БДП за одбрана и уште 1,5% за инфраструктура поврзана со безбедноста, до 2035 година..
- „Ако навистина сакате да одите сами, заборавете дека некогаш можете да стигнете таму со 5%. Ќе биде 10%. Мора да изградите сопствен нуклеарен капацитет. Тоа чини милијарди и милијарди евра. Без САД, Европа ќе го изгуби крајниот гарант на нашата слобода, а тоа е американскиот нуклеарен чадор. Па, со среќа!“, порача Руте.
- Генералот Џанг Јуксија, оперативниот шеф на кинеската Народноослободителната армија и близок соработник на претседателот, е разрешен од функцијата поради обвинувања дека му давал на Вашингтон податоци за кинеското нуклеарно оружје.
- Генералот ќе одговара пред воен суд за примање мито за да унапреди висок офицер во министер за одбрана и за формирање „политички клики“.
- Џанг важеше за „недопирлив“ во врвот на армијата, бидејќи му е другар од детството на врховниот лидер Ши Џинпиг.
- Незадоволен од бавното темпо на реформите во армијата, претседателот Ши во октомври разреши девет високи генерали.
- Ши повеќе од двојно го зголеми буџетот за одбрана на Кина, како дел од напорите да ја претвори армијата во водечка борбена сила во светот до 2049 година.
