На прославата на 11 октомври во Куманово владината врхушка застана над коските на македонските партизани убиени од бугарскиот фашистички окупатор, и свесно одлучи да им се подлизува на наследниците на истиот овој окупатор целосно демолирајќи ја химната на македонското партизанско движење под која загинаа овие борци.
На прославата е изведена искасапена верзија на „А бре, Македонче“ во која зборовите „клетите фашисти“ (во народот познати и како бугарски фашистички окупатор) вчера беа заменети со „душманите клети“.
Песната е изведена од хор, што значи некој со месеци ја адаптирал, пишувал и вежбал фашистичко-угодна верзија.
Во спомен коструницата во Куманово, каде се одржа прославата, се погребани останките на 300 борци загинати во Втората светска војна.
Американскиот претседател Доналд Трамп побара од Иранците да продолжат со протестите и да ги преземат институциите, ветувајќи им помош.
„Ирански патриоти, продолжете да протестирате. Преземете ги вашите институции. Зачувајте ги имињата на убијците и насилниците. Тие ќе платат висока цена. Ги откажав сите состаноци со ирански претставници сè додека не престане бесмисленото убивање на демонстрантите. Помошта е на пат. МИГА!“, објави Трамп на својот профил.
Претставничката на Белата куќа Каролин Ливит вчера изјави дека претседателот „не се плаши да ја употреби смртоносната сила и моќ на американската армија ако оцени дека е потребно“.
„Дипломатијата секогаш е првата опција за претседателот. Воздушните удари се една од многуте опции што се на располагање на врховниот командант“, изјави Ливит.
Иранскиот министер за надворешни работи вчера изјави дека е во контакт со американскиот специјален претставник Стив Виткоф и дека останува отворен каналот за комуникации помеѓу Техеран и Вашингтон. Новата порака на Трамп го затвори овој канал.
Близу 2.000 луѓе, и демонстранти и припадници на силите за безбедност, досега загинале во масовните протести низ Иран, изјавил за Ројтерс анонимен функционер од Техеран. Тој не прецизирал по колку жртви има од секоја страна.
Од Техеран досега немало ниту едно официјално соопштение за бројот на загинати, а нема ни прецизни независни извештаи поради речиси целосната блокада на интернетот.
„Владата ги смета и безбедносните сили и демонстрантите за свои деца. Во рамките на нашите можности, се обидовме и ќе се обидеме да ги слушнеме нивните гласови, дури и ако некои се обидоа да ги злоупотребат протестите“, изјави портпаролката на владата Фатемех Мохаџерани.
Изворот на Ројтерс ги нарекол демонстрантите „терористи“, што сведочи за двоен пристап на властите кон протестите. Претседателот Масуд Пезешкијан вчера изјави дека „владата ја слушнала загриженоста на дуќанџиите“ и дека „вложува максимални напори да ги реши нивните економски проблеми“.
Пезешкијан ја префрли одговорноста за нередите врз терористи уфрлени од САД и Израел, во обид да го дестабилизираат Иран. „Тие обучија некои луѓе во земјата и потплатија терористи однадвор“, изјави претседателот.
