Вести › Набрзинка

ЕУ спрема царини за авиони, коли, лекови и храна од САД

15 јули 2025

Европската комисија подготвила список американски производи што би биле опфатени со евентуалните царински контрамерки, ако пропаднат преговорите со САД за постигнување трговски договор до 1 август.
Најновата закана од Доналд Трамп за членките од ЕУ е основна тарифа од 30%, која се очекува да ја десеткува трговијата.
На европскиот список за контратарифи се американски производи со проценета увозна вредност од 72 милијарди евра - авиони, машини, автомобили, хемикалии, медицинска опрема, електрични апарати и прецизни уреди. Вклучени се и земјоделски и прехрамбени производи, разни овошја и зеленчуци, вино, пиво и жестоки пијалоци, во вкупна вредност од 6,35 милијарди евра.
Во април, кога Трамп првпат им се закани на европските партнери со „реципрочни“ тарифи од 20%, ЕУ одобри царини за американски производи во износ од 21 милијарда евра. Тие мерки итно беа суспендирани за да почнат преговори.
Во мај Трамп се закани со тарифи од 50%, а ЕУ го зголеми пакетот на американска стока од 95 милијарди евра.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор