Вести › Набрзинка

Дизелот поскапува за 14 денари, бензинот за 5

9 март 2026

Дизелот поскапува за 14,50 денари за литар и од утре ќе се продава за 85,50 денари, како последица на поскапувањето на нафтените деривати на светските пазари, објави Регулаторната комисија.
Поскапуваат и моторните бензини за 5 денари. Литар еуросупер 95 ќе чини 79,50 денари, а еуросупер 98 ќе чини 81,50 денари.
Екстра лесното масло за горење ќе чини 82,50 денари за литар, а мазутот ќе биде 42,57 денари за килограм.
„Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 13,38%, кај дизелот за 36,13%, кај екстра лесното масло за 32,102% и кај мазутот зголемувањето е за 27,87%“, соопшти Регулаторната комисија.
Владата на Хрватска, пак, денеска на итна седница реши да ги ограничи цените на горивата на пумпите на 1,50 евра за бензин и 1,55 евра за дизел. Воведе уредби за највисока малопродажна цена на нафтените деривати и за регулирање на износот на акцизите за енергетските производи и струјата.
Според проценките, без владината интервенција полнењето резервоар од 50 литри со дизел би било поскапо за 12 евра, а со бензин би било поскапо за 4,5 евра.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор