- Славчо Неделковски, првиот човек на битолското детско ликовно студио „Свети Кирил и Методиј“, кој успеа 15 деца, без дозвола од родителите, да ги однесе на сликање и гачки кај бугарскиот претседател Радев веќе поодамна е длабоко загазен и ужива во бугарската страна на историјата.
- Паралелно со уметничките активности и организацијата на туристичките аранжмани за малолетници за посета на бугарскиот претседател Радев и гробот на бугарскиот цар и наредбодавател на депортацијата на Евреите од Македонија, Борис Трети, Неделковски води и личен блог од кој незгодно би му паднало и на бугарски историчар.
- Од него може да научиме дека Илинденското востание е „круна на бугарското националноослободително движење“, дека Никола Вапцаров е бугарски поет, и дека веќе еднаш треба да се престане со користење на терминот „бугарски фашистички окупатор“ туку дека правилно е „земја под управа на Бугарија“ и „административни властодршци кои не се директни владетели“.
- Во врска со обвиненијата за злоупотреба на деца во политички цели, Неделковски порачува дека тоа што на своја рака, без дозвола од родителите, организирал средба на малолетните членови на студиото со бугарскиот политички врв не е злоупотреба како што сакаат да му накалемат и дека тоа допрва ќе треба да се докаже (ко да не нема цел албум слики од средбите).
- Германија планира да воспостави заедничка операција на НАТО на Арктикот во обид да го одврати Доналд Трамп од плановите за присвојување на Гренланд. Мисијата „Арктички стражар“ би била скроена според операцијата на НАТО „Балтички стражар“, која почна минатата година за заштита на инфраструктурата во Балтичко Море.
- „За иднината на Гренланд исклучиво треба да решаваат Данска и Гренланд. Територијалниот суверенитет и интегритет мора да се почитуваат. Овие принципи на меѓународното право важат за сите - вклучително и за САД. Ние работиме заедно како сојузници на НАТО за да ја зголемиме безбедноста на Арктикот, а не едни против други“, порача германскиот вицеканцелар Ларс Клингбеил.
- Трамп тврди дека Гренланд има стратегиско значење за безбедноста на САД и се закани дека ќе ја присвои - со воена сила доколку е потребно - контролата врз автономната територија на Данска, членка на НАТО. Трамп предупредува дека Москва или Пекинг ќе го заземат островот ако САД не го сторат тоа.
- И британскиот премиер Кир Стармер побара разговори со европските сојузници за распоредување воена сила на Гренланд. Плановите, сè уште во рана фаза, би можеле да вклучуваат британски војници, воени бродови и авиони за чување на островот.
- Иранците се наоѓаат меѓу две опции: да бидат охрабрени од заканите на Трамп кон официјален Техеран дека ќе интервенира тргне со масовна пресметка со демонстрантите или да бидат обесхрабрени од заканите на главниот обвинител дека учесниците во протестите ќе се сметаат за „непријатели на бога“, дело што повлекува смртна казна.
- Оние првите протестираат веќе две недели, западни извори тврдат сè помасовно. Растат и насилствата. Се јавува за преку 160 мртви, беа запалени објекти и по некоја џамија во Техеран и другите поголеми градови.
- Реза Пахлави од безбедна далечина од предградие на Вашингтон побара демонстрантите да ги заземат градските центри а тој се подготвувал за враќање во земјата.
- Екс оперативец на ЦИА за Иран тврди дека ајатолахот има најмногу недела-две додека теократсккот режим се сруши.
- Техеран го исклучи интернетот толку прецизно и систематски што ни сателитскиот Старлинк на Илон Маск засега не помага.
- Најбитното на крај: Урсула фон дер Лајен на демонстрантите им порача дека „ЕУ стои со нив“.
