- Европската комисија ја опомена Македонија (меѓу другото позната по злоупотреба на „европското знаменце“ за носење на какви се не перверзии од закони вон секоја процедура) дека уште од 2021 не презела мерки за дополнително да ја усогласи визната политика со таа на ЕУ, односно да воведе визи за жителите на неколку држави меѓу кои и Косово и Турција.
- ЕУ во опомената до Македонија пишува „Секое отстапување од листата на ЕУ на земји за кои е потребна виза треба да биде избегнато“ како и дека „тоа ќе биде важна тема во понатамошниот дијалог помеѓу ЕУ и Македонија".
- На вака сериозниот укор од ЕУ одговори Бујар Османи, човекот кој треба да нè внесе таму и кој со месеци ни објаснува како па и не е така страшно да и се попушти на Бугарија за сите откажувања што ги бара од нас имајќи ја предвид големата награда - членство во ЕУ.
- Пораката од истиот овој Османи до ЕУ е - визи за Косово не воведуваме, дополнувајќи со ароганција на човек кој од 2006 е на власт, тој порачува (на ЕУ и нам) „заклучокот на Европската комисија ќе биде ревидиран“.
- Џефри Епстин во имејл во 2011 година запишал дека Доналд Трамп поминал неколку часа со жртва на неговиот синџир за проституција во неговиот дом, тврдат демократски конгресмени од Комитетот за надзор на Претставничкиот дом. Овој мејл, според демократските конгресмени, Епстин го испратил до својата партнерка Гислејн Максвел.
- Во друг мејл, испратен до новинарот Мајкл Волф, Епстин напишал за Трамп: „Секако дека знаеше за девојките, бидејќи бараше од Гислејн да запре“.
- Трамп признава дека се познавал со Епстин, но категорично ги отфрла тврдењата дека знаел за неговиот синџир за проституција и подведувањето малолетнички.
- Епстин беше пронајден обесен во својата затворска ќелија во 2019 година, како жртва на наводно самоубиство, а Максвел отслужува казна од 20 години затвор бидејќи му помагала на Епстин во злоупотреба на малолетнички.
- Десетици домородци од амазонските племиња насилно упаднаа во зградата во која се одржува глобалниот климатски самит КОП30 во бразилскиот град Белем, протестирајќи против земјоделците и индустријалците што ги загрозуваат нивните заедници и им ја уништуваат природата од која живеат.
- Воинствените демонстранти се судриле со обезбедувањето, при што имало и повредени, но биле спречени да се пробијат до главната сала во која биле високите светски претставници.
- „Нашата земја не е на продажба. Не јадеме пари. Сакаме нашите земји да бидат заштитени од агробизнисот, црпењето нафта, нелегалните рудници и сечата на дрвја“, порача претставник на локалното племе Тупинамба.
- Токму заради самитот КОП30 бразилските власти ја осакатија Амазонската прашума. Десетици илјади хектари заштитена шума беа жртвувани за да се изгради автопат од 13 километри од аеродромот во Белем до конференцискиот центар.
