- Поради реакции од арапски и муслимански земји, поранешниот британски премиер Тони Блер повеќе не е во игра за да го води „Одборот за мир“ што привремено ќе ја управува Газа.
- Американскиот претседател Доналд Трамп ќе биде церемонијален претседател на Одборот, а за позицијата шеф на Извршниот комитет е планиран поранешниот бугарски министер за одбрана Николај Младенов, тврдат за Фајненшл тајмс извори запознаени со политичките подготовки.
- Задачата на Младенов ќе биде да ги координира активностите помеѓу Одборот и локалната палестинска управа, која ќе ги спроведува одлуките и плановите на терен во Газа.
- Бугарскиот дипломат Младенов беше специјален претставник на Обединетите нации за блискоисточниот процес од 2015 до 2020 година, а сега е прв човек на дипломатска академија Гаргаш во Абу Даби.
- Процесот на составување привремена власт во Газа сè уште е во почетна фаза. Не се знае составот ниту мандатот на меѓународните сили за стабилизација, кои треба да се грижат за безбедноста на граѓаните и за почитувањето на примирјето. Не е дефиниран ни механизам за разоружување на Хамас.
- Генералот Џанг Јуксија, оперативниот шеф на кинеската Народноослободителната армија и близок соработник на претседателот, е разрешен од функцијата поради обвинувања дека му давал на Вашингтон податоци за кинеското нуклеарно оружје.
- Генералот ќе одговара пред воен суд за примање мито за да унапреди висок офицер во министер за одбрана и за формирање „политички клики“.
- Џанг важеше за „недопирлив“ во врвот на армијата, бидејќи му е другар од детството на врховниот лидер Ши Џинпиг.
- Незадоволен од бавното темпо на реформите во армијата, претседателот Ши во октомври разреши девет високи генерали.
- Ши повеќе од двојно го зголеми буџетот за одбрана на Кина, како дел од напорите да ја претвори армијата во водечка борбена сила во светот до 2049 година.
- Поранешниот претседател на МАНУ, Љупчо Коцарев го повикува актуелниот прв човек на Академијата, Живко Попов да ја напушти функцијата. Причините Коцарев ги гледа во огромниот број нелегални дејства што ги потпишал претседателот на МАНУ во 2025 година.
- Коцарев го повикува и Државниот завод за ревизија да направи ревизија на работењето на МАНУ.
- „Дали состојбата во МАНУ, можеби, ќе се подобри во втората половина на 2026 година? Според моето мислење, надминувањето на состојбата во која се наоѓа МАНУ, ќе повторам – за што е виновен исклучиво претседателот на МАНУ, се граничи со невозможна мисија. Разумот и словото на правото одамна – повеќе од една година, не се присутни во просториите на Академијата. Континуирано, синхронизирано и оркестрирано, низ шепот, провејуваат неосновани обвиненија против мене, се оцрнува работата на досегашниот секретар на Секретаријатот на МАНУ, се проблематизираат барањата на членовите на МАНУ, кои за одредени прашања немаат исто мислење со претседателот на МАНУ, се напаѓа дел од администрацијата како дел од целокупното сценарио, се оптоваруваат со административна работа научните соработници коишто соработуваат со мене, па оттука, надежта дека Собранието ќе стори што било со забележителен ефект е многу мала“.
- „Ви се обраќам Вам, претседателе, зашто Вие не сте достоен за извршување на функцијата претседател. Заминете си, за доброто на МАНУ!“, пишува Коцарев.
