- Иако го има на десетици фотографии со Џефри Епстин и со девојки на неговите имоти, поранешниот американски претседател Бил Клинтон изјави пред конгресмени дека не видел ништо лошо и не направил ништо лошо додека се дружел со финансиерот осуден за сексуална трговија со малолетнички.
- „Немав поим за злосторствата на Епстин. Без оглед колку фотографии ми покажувате, две работи се поважни од вашата интерпретација на тие фотографии стари 20 години. Знам што видов, и што е поважно, знам што не видов. Знам што направив и знам што не направив. Не видов ништо и не направив ништо погрешно“, изјави Бил Клинтон во видео-порака по сведочењето зад затворени врати пред Комитетот за надзор на Претставничкиот дом.
- „Како некој што пораснал во дом со семејно насилство, не само што немаше да летам со неговиот авион ако имав барем поим што прави, туку самиот ќе го пријавев за неговите злосторства“, додаде поранешниот претседател.
- Претседателот на комитетот, Џејмс Комер, изјави дека Клинтон одговорил на сите прашања. Конгресмените го прашале и за врските на Доналд Трамп со Епстин и дали и актуелниот претседател треба да биде повикан да сведочи. „Тоа вие треба да го одлучите“, одговорил Клинтон.
- Неговата сопруга Хилари сведочеше пред Комитетот претходниот ден. Таа изјави дека не се сеќава дека се запознала со Епстин и дека не знае ништо за неговите злосторства.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
