- Со свечени говори и церемонија, многу гости и без одговори на прашањата у дилемите, целата влада, актуелни и поранешни политичари и пратеници дојдоа на наплатнaта станица на патниот правец Тетово – Гостивар за да ја отворат таблата со слика од бројот 8.
- Вицепремиерот Груби за овој проект посебно му се заблагодари на својот лидер Ахмети.
- По низата објави за големите пропусти за надзорот и консултациите за коридорите, Обвинителство отвори и предмет по допрен глас за сите спорни компании. Во надзорот има фирма на бегалец од законот, со поранешна забрана за учество во вакви проекти, но и компанијата која пред овој автопат се занимавала со производство на долна облека.
- Американската морнарица привремено ќе ја прекине операцијата за извлекување на заглавени бродови низ Ормускиот теснец, бидејќи е постигнат „голем напредок“ за постигнување договор со Иран, објави Доналд Трамп.
- „Проектот Слобода“ почна во понеделникот, овозможи преминување на само два товарни брода низ протокот и предизвика престрелка на американската морнарица со ирански патролни чамци.
- Трамп рече дека ја суспендирал операцијата по барање од Пакистан, кој посредува меѓу САД и Иран. Американската блокада на иранските пристаништа ќе остане на сила.
- Иранските државни медиуми го опишаа ова како победа за Техеран и истакнаа дека Трамп „се повлекол по континуираните неуспеси за деблокирање на виталниот поморски теснец“.
- Неколку часа претходно, државниот секретар Марко Рубио објави дека американско-израелската операција „Епски бес“ е завршена откако „ги постигнала своите цели“.
- Целите на САД, според конфузните изјави од Белата куќа во изминатите два месеци, опфаќаа промена на режимот во Техеран и уништување на нуклеарните капацитети и балистичките проектили на Иран.
- Авиокомпаниите веќе откажаа 13.000 летови закажани за овој месец и намалија 2 милиони седишта во патничките авиони, прилагодувајќи ги своите политики на недостигот на керозин поради блокадата на Ормускиот проток.
- Вкупниот број на достапни седишта кај сите авиокомпании ширум светот во текот на мај се намалил од 132 милиони на 130 милиони, според аналитичката група „Cirium“.
- На линиите каде што побарувачката е силна, авиокомпаниите ќе ги зголемат цените на билетите, а во поекстремни случаи целосно ќе ги откажуваат летовите на послабите линии.
- Германската „Луфтханза“ презеде досега најагресивни чекори во Европа, намалувајќи од летниот распоред вкупно 20.000 летови на кратки релации преку својата подружница CityLine.
- Некои помали компании, како EasyJet и Wizz Air, гарантираат дека нема да откажат летови до септември, затоа што имаат резерви гориво нарачано по фиксна цена.
- Експерти предупредуваат дека за време на летната туристичка сезона може да има уште поголеми нарушувања, со можни промени на термините и укинување на линии.
