Вести › Набрзинка

Австралија ќе ја признае Палестина

11 август 2025

Австралија во септември ќе ја признае Палестина „за да ја прекине спиралата на насилство“ на Блискиот Исток. Ќе им се придружи на Франција, Британија и Канада, кои најавија дека ќе го сторат тоа на Генералното собрание на ОН во Њујорк.
„Австралија ќе го признае правото на Палестинците да имаат сопствена држава. Решението со две држави е најдобрата надеж на човештвото за да се прекине спиралата на насилства на Блискиот Исток и конечно да запрат војната, страдањата и гладувањето во Газа“, изјави премиерот Ентони Албанезе. Тој истакна дека единствен услов за признавањето на Палестина се гаранциите дека Хамас нема да има улога во идната палестинска власт.
Австралијците ја притискаат владата на Албанезе да воведе санкции за Израел поради уништувањето на Газа. Повеќе од 90.000 луѓе во Сиднеј пред неколку дена беа на протестен марш во знак на поддршка на Палестинците.
И Нов Зеланд најави дека „ќе ја преразгледа позицијата“ и дека би можел да ја признае Палестина. „Нов Зеланд следи дали се исполнети условите за одржлива палестинска држава, во поглед на безбедноста, политиката, дипломатијата и економијата. Нашите партнери се поделени за ова прашање. Кабинетот ќе донесе одлука до септември“, изјави министерот за надворешни работи, Винстон Питерс.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор