- Службеници од двете главни антикорупциски агенции НАБУ и САПО извршија претрес во домот на Андриј Јермак, моќниот шеф на кабинетот на претседателот Володимир Зеленски. Јермак тврди дека целосно соработува со истражителите.
- Рацијата спроведена денеска рано наутро е дел од истрагата за злоупотреба на стотина милиони долари во енергетскиот сектор - функционери земале мито од изведувачи ангажирани за заштита на инфраструктурата од руски напади.
- Операцијата Мидас опфаќа високи владини функционери. Зеленски побара оставка од министерот за правда Герман Галушченко и министерката за енергетика Свитлана Гринчук, кои биле дел од групата. Првоосомничениот Тимур Миндич - близок деловен партнер на Зеленски, избега од земјата.
- Зеленски неодамна го назначи Јермак да го води украинскиот тим на мировните преговори со администрацијата на Трамп за мир во Украина.
- Претседателот во јули се обиде да им ја одземе независноста на двете антикорупциски агенции, но мораше да го повлече законот по масовни протести и притисок од западните сојузници.
- Полските власти официјално ја обжалија судската пресуда на ЕУ која ја обврзува Полска да му плати 1,3 милијарди долари на фармацевтскиот гигант Фајзер за вакцините против ковид што ги нарачала Европската Унија во име на Варшава.
- „Одлуката на првостепениот суд не ги зема предвид сите релевантни фактички и правни околности на предметот“, објави Министерството за здравство на Полска. Бара да се одложи извршувањето на одлуката додека трае постапката по предметот.
- Основа за казната за Полска е контроверзниот договор помеѓу претседателката на Европската комисија, Урсула фон дер Лејен, и директорот на Фајзер за нарачка на милиони дози на вакцини за ковид за потребите на сите членки на ЕУ. Таинственоста на преговорите ја отвори аферата Фајзергејт.
- Полска во 2022 година одби да ја преземе нарачката поради „променетата епидемиолошка состојба и војната во Украина“. Судот во Брисел на 1 април годинава пресуди дека мора да се почитува обврската кон фармацевтскиот гигант, кој не морал ни да ги произведува вакцините кои Полска ги одбила.
- Прва жртва на судската одлука беше полската служба за воздушна навигација PANSA, на која, иако нема никаква врска со вакцините, ѝ беа замрзнати средствата од европското тело за безбедност во воздухопловството Eurocontrol.
- 25 американски сојузни држави - сите предводени од демократите, поднесоа групна тужба против администрацијата на Трамп, тврдејќи дека најновиот бран царини за стоки од 59 трговски партнери и ЕУ ги надминуваат законските овластувања на претседателот за оданочување на увозот.
- Претходно и малите американски бизниси покренаа постапка за блокирање на царините истиот ден кога тие стапија на сила.
- Новите царини од 10% и 12,5% Трамп ги претстави како мерка за спречување увоз на стоки произведени со „принудна работа“. Покриваат 99,4% од вкупниот увоз на САД. Важат и за Кина, Европската Унија и Британија.
- И претходни претседатели се повикувале на Законот за трговија од 1974 година за борба против нефер или дискриминаторски економски практики на други држави. Но, сојузните држави тврдат дека царините со оваа основа биле насочени кон конкретни земји и индустрии, додека широкиот и неселективен пристап на Трамп нема историски преседан.
