- Премиерката на Алберта закажа референдум за тоа дали покраината треба да остане во Канада. Ако на гласањето на 19 октомври тоа биде одбиено, ќе биде распишан нов референдум за отцепување на богатата покраина од Канада.
- Премиерката Даниел Смит објасни дека добила две петиции – една со над 300.000 потписи за референдум за независност, и друга со 400.000 потписи за Алберта да остане во Канада.
- Сложеното референдумско прашање ќе гласи: „Дали Алберта треба да остане покраина на Канада или Владата на Алберта треба да го почне процесот потребен според канадскиот Устав за да одржи обврзувачки покраински референдум за тоа дали Алберта треба да се одвои од Канада?“.
- Смит ја отфрли неодамнешната судска одлука дека не може да се одржи референдум без да бидат консултирани групите на домородните Први нации. „Нема да дозволам правна грешка на еден судија да ги замолчи гласовите на стотици илјади жители. Иднината на Алберта ќе ја одлучат жителите, а не судовите“, изјави премиерката.
- Жителите на Квебек двапати на референдум гласаа да останат во Канада - во 1995 година со тесно мнозинство од 50,6% наспроти 49,2%.
- Доналд Трамп најави дека ќе испрати уште 5.000 американски војници во Полска, неполна недела откако САД ненадејно го откажаа распоредувањето на 4.000 трупи во оваа земја.
- Трамп објасни дека ја донел новата одлука поради добрите односи со новиот полски претседател. „Врз основа на успешниот избор на сегашниот претседател на Полска, Карол Навроцки, кого со гордост го поддржав, и нашиот однос со него, со задоволство објавувам дека САД ќе испратат дополнителни 5.000 војници во Полска“, порача Трамп на Truth Social.
- Европа е во конфузија. Администрацијата на Трамп пред две недели објави дека ќе повлече околу 5.000 војници од контингентите кај партнерите од НАТО во Европа, кои ги обвини дека не го преземаат доволно голем товар за сопствената одбрана и не направиле повеќе за да ја поддржат војната на САД против Иран.
- Пред една недела Пентагон го откажа најавеното испраќање на 4.000 војници од армиската Втора оклопна бригада во Полска. Откажано беше и распоредувањето на персонал обучен за управување ракетни системи со долг дострел во Германија.
- „Ова не се добро осмислени одлуки. Ова се импулсивни одлуки засновани на каприците на Трамп. (Државниот секретар) Рубио ќе има тешкотии да им ги објасни дивите промени на Трамп на Европејците кои бараат конзистентност, дури и ако не се согласуваат, оцени Иан Кели, амбасадор на САД во Грузија во времето на првата администрација на Трамп.
- Европратениците застанаа во одбрана на гејмерите, ја поддржаа граѓанската иницијатива „Стоп за уништувањето на видео игрите“ и ја повикаа Европската комисија да предложи рамка која ќе обезбеди постарите игри да не станат преку ноќ недостапни за оние кои ги купиле.
- Иницијативата бара заштита на потрошувачите од издавачите на игри кои со гаснење на серверите оневозможуваат пристап до купен производ односно содржина. Велат дека видео игрите се дел од културното богатство и мора да се најде начин тие да ги преживеат корпоративните одлуки за нивно гаснење.
- Иницијативата ја потпишале близу 1,3 милиони граѓани на ЕУ, и таа го достигнала бараниот минимален праг во 24 земји.
- Нејзините претставници истакнуваат дека сегашната практика за гаснење и бришење на игрите „ги лишува европските граѓани од нивниот имот бидејќи им го ускратува пристапот до производот што го купиле во непредвидлив и произволен момент“. Сакаат да се обезбеди игрите, откако ќе станат „офлајн“, да можат да продолжат да се играат во некоја форма.
