Линкот ни го прати нашиот пријател Коста Бургов и тоа само по себе е доволно, но, да контекстуализираме уште малку. Пред некој ден со ќеиф пишувавме статија за поранешниот претседател на Уругвај (види: Ако веќе зборуваме за лидери....) како екстензија на извонредното видео во кое мудриот човек зборува за вредностите, парите, времето, имањето, бивањето...

The Glitch е кратко мк филмче направено од мала група млади луѓе кои планираат да снимаат забавни скечови како Petty Cash Production. Снимено е со  нивни пари (petty cash, indeed) па ѕирнете: ако ви се бендиса, ќе ги замаптиме, тие ќе се охрабрат па ќе направат уште подобри парчиња, ние ќе им викаме браво дечки и така уствари светов станува за ронка подобар ("Единствената причина зошто се бавам со оваа работа е што мислам дека светот го менувам на подобро за глувчешко куре" - Рамбо Амадеус).

Јако, љуто, прљаво и мрсно. "Зад аголот" го прават тоа баш како што треба. Скопскиот рап состав имаат нов албум ("Зад Шпиунката" - 21 песна) и со овој заебано добар спот на химничната "Спас им нема" најавуваат дека допрва ќе горат газиња наоколу. Како што рече некој, спотов е "Мамата у книшка!" Keep up, бандо.

Објавуваме ние редовно медиумски пакетчиња но некогаш некои феномени заслужуваат и одвоено место бидејќи сведочат за едно групно помрачување на умот во чиј информативен брлог живееме (без разлика на идеолошките или политичките симпатии на медиумот кои пак на толпата ѝ се единствено битни). Просто - незнаење и фушерај кој се копира, пастира, размножува до бескрај. Во таков свет авангардниот руски писател Хармс лесно станува палестински ХАМАС.

Седумнаесет наши гитаристи, секој снимил свое парче соло на истата матрица и сето тоа склопено во интересно видео. Можеби Македонија нема некоја технологија, ама затоа техника има за курчење! Кој од кој махери.