Свинско филе, или шо би рекле експертите по чуло-не-дочулологија: Свински БИФТЕК (глупсус лингва засекогаш) е еден од најнежните, ако не и најнежен свински мускул. Не за џабе го викаат Gentleman's Cut. По нашите кафани највеќе е форсиран у панирана варијанта со работен наслов „Бечка Шницла“. Но пошто „ние не сме Турци, Аустријци ни Срцки“, ќе го хекламе како плетенка.
Идеме: Свинско филе, од прилика пола кило. На сантиметар ипол од едниот крај правиме два истоветни пресеци кои треба да го поделат парчето на три приближно исти делови. Треба да добиеме нешто налик на свински октопод со три краци. Ги вкрстуваме ‚краците‘ во плетенка.
Плетенката ја шатираме со сол, бибер, лук во прав и црвен пипер. Ако краевите од месниот прамен ви штрчат, соберете ги со чачкалица. Вака средената свинска фризура оди на фенирање у рерна загреана на 200 по познатиот швицарски бербер Целзиуз, 30-35 минути, во зависност од големината на парчето.
Овие половина час ќе ги искористиме за спремање на нашата крем салата од зелка. Хипстераната и тиктокериштата ја викаат ‚Кулсла‘. Најчесто ја прават со мајонез но поради калоричен суфицит, ние ќе ја укремиме со павлака и сенф.
Значи: зелка на т'нко, моркови исто на т'нко, младо кромидче и магдонос. Зејтин, сол и бибер. Мешаме додека целиот зеленчук не се натопи од зејтинот. Потоа додаваме 2 супени лажици павлака и 4 сенф. Повторно на мешалица. Кремастата зелка е одличен додаток за мал милион главни јадења. Ќе си ја форсирате почесто, сигурен сум.
Оуууурајди ден, шо би рекол Господин Господин Џим Кери. Месото надвор. Нека олади едно 10 минути. Потоа го сецкаме на секси медаљони. Јас на секое парче додадов мало топче сенф со цели зрна синап. Набавете си, не е скап а е спектакуларен. Гарнираме со зелка.
За овој ручек ни беа потребни две јетри, пошто алкохолот почна сам да се сипа у чашите.
Кирил Стоименов - Фризерка
