- САД и Кина се договорија привремено да ги намалат реципрочните тарифи на 10%, како прв конкретен чекор за надминување на трговската војна, која поттикна стравувања од глобална рецесија.
- „И двете страни имаат интерес за балансирана трговија. Превисоките тарифи практично беа ембарго. Никој не го сака тоа. Сакаме трговија“, изјави американскиот министер за финансии Скот Бесент по преговорите со кинески претставници во Женева.
- Доналд Трамп неколку пати ги зголемуваше царините за увоз на кинески производи додека не ги крена на 145%. Кина возврати со тарифи од 125% за американски производи.
- Како прва реакција на веста, вредноста на доларот зајакна во однос на другите валути на светските берзи.
- По речиси еден месец тактизирање, Таравари го најави излегувањето од Владата со проценка дека подобро е да има пет градоначалници отколку двајца министри.
- Мицкоски веќе им посака среќа во опозиција, иако, како што рече, не ги разбира зошто од власт одат во прегратките на ДУИ на Али Ахмети.
- Главната битка на „одметнатата Алијанса“ е како да ги задржи петте пратеници. Токму нивното единство од една страна ќе значи дека АА ќе има пратеничка група, а од друга дека Вреди, односно власта, со само девет пратеници од заедниците ќе нема Бадентерово мнозинство.
- Германија и постави ултимативно барање на Русија до крајот на денот да се изјасни за понудата за 30-дневно примирје за да избегне нови санкции од Европа.
- „Часовникот отчукува. До крајот на денот остануваат 12 часа. Ако Москва не го прифати барањето (за примирје) ќе бидат покренати подготовки за нови санкции“, изјави претставникот на германската влада Штефан Корнелиус.
- „Јазикот на ултиматуми е неприфатлив за Русија, не можете да разговарате со Русија на таков јазик“, врати портпаролот Димитри Песков.
- Русија и досега не се возбудуваше многу од санкциите што ѝ ги наметнуваше Европа поради воената интервенција во Украина.
- Европските лидери во саботата од Киев побараа безусловно 30-дневнo примирје, почнувајќи од денеска. Владимир Путин возврати со предлог Русија и Украина да се сретнат на преговори в четврток во Истанбул.
