Bookbox › Набрзинка

Востановена награда за ученици талентирани за наука, „Иван Ќостаров“

22 септември 2023

Наградата од 30.000 денари за ученици талентирани за наука доделува платформата „Наука за деца“ во соработка со проф. д-р Венка Симовска. Наградата се востановува за првпат и ја најавува втората Научна конференција во организација на „Наука за деца“, која ќе се одржи на 7 октомври во Скопје.
Наградата е посветена на Иван Ќостаров, македонски научник кој долги години живеел во Данска. Таа се доделува за љубов кон науката, оригиналност и свесност како науката може да придонесе за личен и општествен развој.
Може да конкурираат сите ученици од 6-9 одделение од основните училишта во Македонија. Подетално за условите и начинот на пријавување на линкот.

3 април 2025

Утре (петок, 4 април) во Градската библиотека „Браќа Миладиновци“ – Скопје ќе се одржи разговор со писателот и преведувач Владимир Јанковски, чиј роман „Ехото на акробатите“ е книга за месец април во сите библиотеки од мрежата на ГБСК. Разговорите со домашни автори, книгата на месецот и клубот на читатели се препознатливите елементи на големата кампања „Читаме современи македонски автори“.
Модератор ќе биде Александра Јуруковска, а фрагменти ќе чита актерот Андреј Серафимовски. Настанот ќе се одржи во 19 часот во спомен-собата „Т’га за југ“.
Јанковски за оваа книга ја доби наградата „Пегаз“ за најдобар необјавен роман во 2024 година, признание што го доделува издавачката куќа Арс Ламина.

31 март 2025

Второто издание на фестивалот за литература и општа култура „Видик“ ќе се одржи од 2 до 16 април 2025 во организација на „Литература.мк“. Тој се отвора во среда (2 април) во 19 часот во книжарницата во Дајмонд мол со промоција на новиот роман „Три Марии“ на Оливера Ќорверзироска. Следат 15 уникатни настани кои се спој на литература, музика, театар, дизајн и филм.
Средствата од продадените билети за музичките и театарските настани ќе бидат донирани за настраданите во несреќата во Кочани.
Присуството на музичките и на театарските настани е со влезници и со резервации на 070 391 100.
Повеќе детали за целосната програма тука