- Во четврток, 14.12, во 20 часот во горната галерија на Младинскиот културен центар ќе се отвори изложбата на графичкиот дизајнер Огнен Ранковиќ, посветена на некогашните логоа на југословенските претпријатија и институции. Претходно изложбата беше поставена во Europe House во Битола.
- Изложбата брои 460 дела во мал формат. Авторот ги има дигитализирано и архивирано овие знаци за тие да послужат како инспирација на новите генерации но и за да им се оддаде заслужената почит на пионерите на дизајнот на овие простори.
- Подетално за Ранковиќ и југо.лого види претходно во статијата „Српскиот уметник кој ги спасува старите југословенски логоа од заборав“.
- На 79 годишна возраст почина Илија Пенушлиски, еден од најреномираните македонски сликари.
- Во објавата на социјалните мрежи неговиот син, Илија Митрев-Пенушлиски, напиша: „Беше исклучителен уметник, познат на многумина, но рамнодушен кон тоа да биде познат. Неговите идоли беа уметници, каубои, пијаници и Хозе Мухика“ (уругвајскиот претседател кого го нарекуваа „најскромниот на светот“).
- Роден е во Скопје 1947. Дипломирал на Академијата за ликовни уметности во Белград во 1971 година. Во 1972/73 бил на постдипломски студии на Прат институтот во Њујорк како Фулбрајтов стипендист, и има бројни самостојни изложби во земјава и во странство.
- Неговиот сликарски израз е препознатлив по урбаните мотиви, често инспирирани од Скопје и неговата архитектура. Во неговите платна може да се забележи динамика на градот, преплет на форми и линии, како и богата и експресивна колористика. Пенушлиски не се ограничувал на класични претстави, туку често експериментирал со апстракција, создавајќи дела што оставаат силен визуелен впечаток и поттикнуваат размислување. Неговата последна изложба, изложба „Градот“, каде за првпат во својата плодна и светска кариера работи со дигитална графика, беше во 2018 во скопската галерија „Акантус“.
- Со проекција на филмот „Нов бран“, на 20 март, официјално ќе започне со работа новото филмско катче во центарот на Скопје – „Фино кино“.
- Идејата на „Фино кино“, проект на приватниот културен центар „Лабораториум“, е создавање на непретенциозно „џепно“ артхаус кино и нова културна платформа со внимателно одбрана програма – иницијатива за која oрганизаторите се надеваат дека ќе се претвори во жива неформална заедница со филмската уметност во својот фокус.
- Овој прв викенд на репертоарот на „Фино кино“ ќе бидат „Нов бран“ на режисерот Ричард Линклејтер (петок, 20 март, во 19:00 и недела, 22 март, во 20:00), потоа номинираниот за Оскар анимиран филм „Арко“ (сабота, 21 март, во 12:00 и недела, 22 март, во 18:00) и „Млади мајки“ во режија на браќата Дарден (петок, 20 март, во 21:00), добитник на наградата за најдобро сценарио на Канскиот филмски фестивал.
