Светскиот шампион во Формула 1 чисти отпад на Миконос

На еден од најдобрите пилоти во историјата на Ф1, Британецот Луис Хамилтон му се смачила глетката на една дива плажа, па решил да се симне и да исчисти килограми ѓубре оставено од неодговорни поединци.

Во Формула 1 веќе една недела царува тишината и спокојот на летниот одмор, па сите пилоти и работници полнат батерии пред продолжение на сезоната на 26 август кога ќе се вози трката за ГН на Спа во Белгија.

Одморот го користи и четирикратниот светски шампион и лидер на Мерцедес, Луис Хамилтон кој освен што ужива на плажите на Миконос, предводи и чистка на голем отпад како дел од борбата за заштита на животната средина.

На неговиот официјален акаунт на Твитер се појави видео од чистењето на една дива плажа на која имало тони ѓубре.

„Дечки, погледнете што најдов во едно од најубавите места на земјата. Ќе исчистиме, но просто сакав да покажам како влијаат на природата работите кои ги купуваме и фрламе. На ова место се собира ѓубрето и одвратно е“, вели Хамилтон во видеото. 

Еден од најомилените британски спортисти не кажува на кое место се наоѓа, но во претходните постови тој објави неколку фотографии на кои се гледа како со најблиските другари ужива на Миконос во Грција.