Стигна потврда од ЕХФ: РК Вардар останува без ЛШ

Европската ракометна федерација ја потврди одлуката на Извршниот Комитет, да не му се дозволи следната сезона учество на македонскиот првак во европските купови. Тешко на Вардарци, а со тоа и на македонскиот ракомет.

Конечната одлука, ЕХФ ја објави на својот веб сајт каде образложи дека Вардар не ги исполнува критериумите за да игра во Лигата на шампионите наредната сезона.

Причината за исфрлувањето се финансиските проблеми кои ги влече двократниот европски првак.

Вардарци платиле дел од парите за подмирување на долговите, но не ги испочитувале роковите, што е спротивно на правилата на европската куќа на ракометот.

„Одлуката на Извршниот комитет на ЕХФ следува по период од речиси две години во кој ЕХФ се обидуваше да го реши проблемот со неплаќањата на договорените играчи од страна на клубот и со тоа да го задржи клубот од Скопје на највисоко ниво. Со оглед на тоа што Вардар одлучи активно да го презентира својот став пред медиумите, Европската ракометна федерација одлучи да даде јавен одговор. Овој одговор е директно доставен до клубот во исто време. Европските натпреварувања на клупско ниво имаат многу чувствителна структура и многу зависат од интегритетот на клубовите-учеснички. 

За да се расчистат сите работи со Вардар, имаше многу писмена комуникација, па дури и лични разговори и јасни рокови беа дадени од страна на ЕХФ. За жал, претставниците на клубот не можеа да ги почитуваат овие датуми и поставија стратегија на одложување или дури и неодговарање. Плаќањата беа направени само делумно, а беа преземени неколку обиди датумите да се одложат во следната сезона. Извршниот комитет на состанокот минатиот петок дојде до едногласен заклучок дека Вардар ниту ги исполнил договорените работи, ниту навремено ги завршил плаќањата и со тоа не ги исполнува критериумите за настап во Европските купови во сезоната 22/23.

Депозитот од сметката на ЕХФ веќе беше префрлен на сметката на клубот и дополнително ќе следи трансфер и на преостанатите средства што треба да ги добие клубот. Европската ракометна федерација изрази жалење што беше неопходно да се преземе таков чекор и подвлекува дека тоа не е во интерес на федерацијата, но ситуацијата предизвикана од поранешниот клуб резултираше со дефицити кои не беше едноставно да се покријат преку новиот клуб“, стои во соопштението на ЕХФ.

Михајловски: „Рекла казала“ е муабетот дека Вардар должи, најверојатно ќе одиме на суд

РФМ до ЕХФ: Вардар е бренд на Балканот, ве замолуваме да донесете позитивна одлука

22 јуни 2022 - 13:43