Пандев: Милевски и Сејдини го наместија Ристовски да го исфрлат од националниот тим
8 септември 2024
- „Работите се испуштени од контрола, чашата е прелиена и мора да се стави крај на сето ова. Јас гледам вина и кај Барди и Димитриевски кои се капитени и кои треба да удрат машки на маса и да кажат: `Доста е`. A не да се даваат изјави од типот дека атмосферата никогаш не била подобра“.
- „Премногу понижувачки е односот на селекторот Благоја Милевски кон фудбалот во Македонија, клубовите и младите фудбалери. Свесен човек сам ќе разбере кога и до кога треба да се седи на одредена функција. Tребаше да си оди по оние срамни 7:0 во Англија. Тоа беше неговиот крај, а сето ова до денеска е само борба за секој први во месецот и личниот приход од ФФМ“.
- „Да не зборувам како тој со првиот човек на ФФМ го наместија Стефан Ристовски да го исфрлат од националниот тим. Немаа авторитет врз него и контрола. Знаеја дека нема да им молчи и затоа ја направија играта за некој друг да биде капитен, а по стапките на Ристовски знаеја дека ќе оди и Адеми“.
- „ФФМ последниве години се претвори во чајџилница, во место каде има сè, само не фудбалски работници. Тоа стана полигон за вработување на одредени структури и масовно трошење на финансиите за нефудбалски работи. Каде се проектите, стадионите, терените…? Запуштени дивограби и промашени трибини и рефлектори“.
- „Секојдневно билдање на сметката во Крушино, каде нема услови за работа и каде редовно има семинари на тренери, собир на селекции и судии. Се знае зошто е тоа така! Се полни сметката на хотелот, кој е бизнис на актуелното фудбалско раководство“.
- „Имам порака до Мухамед Сејдини. Пред точно 6 години на Гибралтар му дадов поддршка затоа што имаше визија, сакаше да соработува. Но, тој Мети и овој сега, не се исти личности. Неколку месеци пред ЕП тој фати друг курс, почна да се дружи и да слуша совети од погрешни личности. Го изгуби компасот и затоа сега ни се случува колапс. Да си оди како човек, а не како кукавица“, вели Горан Пандев во интервју за sportsport.mk.
