Offside › Набрзинка

Канте одбил 32 милиони евра само за да брка титула во Турција

15 јануари 2026

Легендарниот француски фудбалер со африканско потекло Н'Голо Канте, играч кој беше важен дел од чудесната генерација на Лестер која сензационално ја освои титулата во Премиер лига, а подоцна се радуваше и на пехарот со Челси, сега е решен да се врати во Европа.
После долго време во Саудиска Арабија, Канте сака да замине од Ал Итихад. Клубот сакал да го задржи и му понудил нов 2-годишен договор вреден 28 милиони евра нето со плус 4 милиони евра достижни бонуси. Но ниту оваа астрономска понуда не била доволна.
Н'Голо Канте сака да биде дел од драматичната трка за титулата меѓу Фенербахче и Галатасарај. Фенер му пратил понуда за да дојде во Истанбул.
Фенербахче неодамна го освои турскиот Суперкуп токму против Галатасарај а титулата во Суперлигата ја чека цели 12 години. Од таа причина сезонава потроши речиси 100 милиони евра на трансфери. Дојдоа Марко Асенсио, голманот Едерсон, Џон Дуран, Матео Гендузи,Милан Шкриниар, Керем Актуркоглу, Нелсон Семедо и многу други.

извор

Ќе се одложуваат натпревари во Евролига, Јасикевичиус и 14 кошаркари од разни клубови заглавени во Дубаи

2 март 2026

Првиот човек на белградски Партизан Остоја Мијаиловиќ во вели дека постои голема веројатност многу натпревари од Евролига да бидат одложени а истата е под голем знак на прашање поради новонастаната ситуација на Блискиот Исток и војната меѓу Израел и САД против Иран.
Евролигашкото 30. коло по ред, треба да се игра во четврток и петок неделава, но прашање е кои натпревари ќе се одиграат а кои ќе се одложат. Сигурно е дека големото дерби меѓу израелските ривали Макаби Тел Авив и Хапоел Тел Авив е одложено од безбедносни причини затоа што Израел е во војна, а овие два клуба речиси сигурно како до неодамна, ќе се вратат да играат во Србија и во Бугарија.
Првиот човек на Партизан во разговор за белградска телевизија К1 рекол дека од неговиот клуб тројца играчи (Дилан Осетковски, Двејн Вашингтон и Шејк Милтон) се заглавени во Дубаи. Таму е уште и тренерот на европскиот шампион Фенербахче Шарунас Јасикевичиус и уште 14 евролигашки играчи. „Нашите играчи отидоа на одмор во Дубаи како и многу луѓе кои во последните 10-15 години го гледаат Дубаи како врвно место за одмор и забава. Отидоа и тоа е нивно право, не можат да добиваат препораки каде да одат а каде да не одат“, вели Мијаиловиќ.
Некои од кошаркарите од Евролига кои се во Дубаи веќе тренирале со КК Дубаи кој во четврток требаше да гостува во Белград на дуел против Партизан но тој меч веројатно ќе се одложи.
„Единствен аеродром кој работи во околина таму е тој во Оман. Отежната е и ситуацијата како да се префрлат (кошаркарите и тренерите) таму, по копнен пат тоа е четири ипол часа. Во овие моменти нема услови тоа да се изведе. Нашите играчи се наша грижа, но ако земеме предвид дека во ОАЕ има 11 милиони жители а само 1 милион се Емирати а сите останати емигранти, тоа значи дека не се само нашите играчи единствена грижа. Многумина чекаат да се вратат од тие подрачја. Ова е шок за сите нас“.

извор

Трагедија: во гранатирање училишна сала во Иран загинале 20 млади одбојкарки

2 март 2026

Во напад на спортска сала во провинцијата Фарс во Иран загинале 20 млади женски одбојкарки. Нападите ги извеле здружено Израел и САД во саботата околу 17 часот по локално време. Иранската телевизија Ал Мајадин цитирала локални власти кои соопштиле дека одбојкарки биле убиени на тренинг во гимназиска сала во градот Ламерд во јужен Иран, во провинцијата Фарс.
Нападот според новинската агенција ИРИБ бил изведен кога внатре во салата имало деца кои играле одбојка. Агенцијата Ташним пренесува дека во нападите биле погодени најмалку четири други објекти во градот Ламерд.
Во саботата Иран соопшти дека во друг напад на женско училиште загинале 200 лица од кои повеќето ученички во училиштето и дека зад нападот стои Вашингтон, а истиот бил изведен со ракети „томахавк“.
Нападот врз женските одбојкарки го осуди и Меѓународната одбојкарска федерација. „Изразуваме најдлабоко сочувство на семејствата на настраданите и на сите кои се погодени од оваа криза која се развива“, стои во соопштението. Меѓународната одбојкарска федерација спремила и хуманитарна помош и сака да обезбеди сигурност за целата одбојкарска заедница во Иран.
„Секунди по ракетниот напад, прозорите се разлетаа во илјадници парчиња. Спортската опрема, топки, табли, огради се разлетаа низ воздухот. Црн чад го исполни местото. Не се дишеше од мирис на чад. Се слушаа врискотници помешани со звук на рушење и паѓање на плафонот“, рекол 29-годишниот Мохамед Саед Хоршеди, вработен во салата кој го сведочел нападот.
Иранската „Црвена полумесечина“ соопшти дека во нападите на здружената коалиција САД-Израел загинале повеќе од 200 лица досега и повредени се повеќе од 750 лица. Организацијата има повеќе од 220 тима на терен за да помага во расчистување на гранатираните објекти и спасување повредени лица.

извор