„Заврши едно поглавје во животот на Евролигата. Траеше 15 години, лигата во тој период напредуваше, но сфативме дека е потребен еден нов, поагресивен бизнис модел кој подразбира динамичен календар, укинување на групите, повеќе меѓусебни средби на големите клубови, како и поголема заработка од ТВ правата", изјави претседателот на ЦСКА, Андреј Ватутин после состанокот во Барселона.
Според Русинот, ЦСКА минатата сезона како третопласиран тим заработил од Евролигата 500.000 евра што е навистина мала сума.
„Американската компанија IMG сака да стане акционер во новото натпреварување. Го претстави 10 годишниот план според кој гарантира вложување 630 милиони евра, а во случај работата да тргне, сумата може да биде зголемена на 759 милиони евра. Од тој буџет, 60% ќе поделат клубовите, конкретно помеѓу 36,3 и 49,2 милиони евра по сезона", заклучи милијардерот Ватутин.
Освен 11-те најголеми клубови со А лиценца, Евролига ќе игра победникот на Еврокупот, победникот на квалификацискиот турнир, како и шампионите на три земји. Речиси е извесно дека Германија и Франција се фаворити за две места, а третата виза би требало да ја добие или АБА лигата или ВТБ лигата или Полска, Турција или Италија.
