Денес на стадионот Вембли во Лондон беше извршено извлекувањето на групите за фудбалскиот турнир на Олимписките игри кој ќе започне на 26-ти јули.
Репрезентацијата на Велика Британија како домаќин на Олимписките игри доби шанса да се натпреварува на фудбалскиот турнир за прв пат по 1960-та година. Фудбалерите предводени од Стјуарт Пирс ќе играат во групата А која е најинтересна во првата фаза. Противници на Велика Британија ќе бидат шампионот на Јужна Америка, репрезентацијата на Уругвај, како и Сенегал и Обединетите Арапски Емирати.
Финалистите од претходните Олимписки игри во Пекинг, репрезентациите на Аргентина и Нигерија нема да учествуваат оваа година, а третопласираниот Бразил е во групата Ц заедно со Белорусија, Нов Зеланд и Египет.
Група А: Велика Британија, Уругвај, ОАЕ, Сенегал
Група Б: Мексико, Јужна Кореја, Швајцарија, Габон
Група Ц: Бразил, Белорусија, Нов Зеланд, Египет
Група Д: Шпанија, Хондурас, Јапонија, Мароко
Репрезентациите ќе бидат составени од фудбалери до 23 години и по тројца повозрасни играчи. Првопласираните две репрезентации од секоја група ќе изборат пласман во четвртфиналето.
Фудбалскиот турнир ќе започне на 26-ти јули, а натпреварите ќе се играат на шест стадиони во Велика Британија, а финалето ќе се одигра на 11-ти август на стадионот Вембли.
