Српскиот фудбалер Горан Ловре ја дели истата судбина со Захир Белунис за кој пишувавме пред неколку дена. Тој е практично заробен во Иран затоа што од неговиот клуб Естенглал не му го враќаат пасошот.
31 годишниот поранешен играч на Андерлехт, Гронинген, Барнсли и Партизан се жали дека примил само 10% од платата за која потпишал договор со иранскиот клуб, а тие бараат да го раскине договорот за да си ги добие парите по 10 дена.
„Се чувствувам како роб и ако треба ќе ги тужам, а ќе ја известам и ФИФА за да знае што се случува во земја која е учесник на идното Светско првенство. Да знаев дека овде е ваква дивина немаше никогаш да дојдам. Мислев дека ова е сериозен клуб затоа што играше и во полуфиналето од Азиската Лига на шампиони, но тие се однесуваат како аматери", раскажува Ловре за српските медиуми.
Тој тврди дека не е единствениот ваков случај во оваа земја, а правдата очекува да ја добие преку српската амбасада во Иран од каде побарал привремена дозвола за излез. Но од таму му одговориле дека ги нема сите потребни документи за тоа и дека процедурата трае еден месец.
