Слалом на Мицевски, гол на Христов, пораз на Бугарија со Стоичков

Исто како Словенија, така и Бугарија до сега ни била противник само на пријателска база. Но со нив имаме полош меѓусебен скор од две победи, три порази и едно реми. Едната победа е многу слатка бидејќи е остварена против четвртата селекција во светот од Мундијалот во САД 1994.

Селекторот Ѓоќо Хаџиевски со кој ја остваривме најдобрата позиција на ранг листата на ФИФА, на 25 март 1998 година истрча со следниов состав: Петар Милошевски, Гоце Седловски, Игор Саша Николовски, Неџмедин Мемеди, Митко Стојковски, Љубодраг Милошевиќ, Срѓан Захариевски, Виктор Треневски, Тони Мицевски, Ѓорги Христов и Артим Шаќири.

Негов колега од спротивниот табор беше Христо Бонев, вториот најдобар стрелец на Бугарија зад Димитар Бербатов со 48 голови. Бугарската селекција на Градски допатува како полуфиналист од Светското првенство во САД каде направи сензација со пласманот, а потоа се пласираше и на следниот Мундијал во Франција.

Предводник во тимот им беше Христо Стоичков кој тогаш ја напушти Барселона со која освои 14 трофеи и се врати во ЦСКА Софија, а играа уште и Здравко Здравков, Радостин Кисишев, Трифон Иванов, Гошо Гинчев, Адалберт Зафиров, Красимир Балаков, Маријан Христов, Светлослав Тодоров, Љубослав Пенев.

Бугарија беше апсолутен фаворит на тој меч и се подготвуваше за Мундијалот во Франција, но Македонија направи големо изненадување и со голот на Ѓорги Христов кој таа година заигра во Премиер лигата со Барнсли, славеше со 1:0.

Голот на Христов на асистенција на Треневски кој го пренесоа и Англичаните.