Илија Несторовски е во топ форма со шест гола на последните шест меча во Серија Б и му фалат уште само два погодока да биде подобар од ланската деби сезона во Палермо.
Тогаш постигна 11 гола на 37 средби во Серија А, а сега има 10 погодоци по 13 кола, процент на успешност подобар и од оној на Лука Тони.
Газета дело Спорт во денешното издание повторно го величи македонскиот репрезентативец без кој не може да дише италијанскиот тим.
„Да, Палермо сезонава е за чиста 10-ка благодарение на головите на Несторовски. Македонецот го постигна третиот погодок на мечот против Авелино и стигна до двојна цифра. Со тоа го мина Тони кој во сезоната 2003/2004 во Серија Б имаше 8 гола на првите 16 средби“.
Во двете сезони во Палермо, Лука Тони стигна до фантастични 50 голови, 30 во првата сезона во втора лига и уште 20 во Серија А, кога му помогна на клубот да стигне до Европа.
За Несторовски тој предизвик е доста сериозен бидејќи за сега има една третина од 30-ка на Тони, но со оглед на тоа што и сезоната е стигната до една третина, а неговото темпо на давање голови е силно, тогаш се е можно.
За Интер Запрешиќ во трите сезони постигна 20, 24 и 25 гола.
