После 22 одиграни кола во грчката фудбалска Супер лига, ПАОК е прв со 52 бода, 6 повеќе од големиот ривал Олимпијакос. Таква ситуација во пролетниот дел од сезоната немало можеби повеќе од една деценија. ПАОК е во страшна серија од 15 победи по ред во сите натпреварувања и кога сите очекуваат мирно да плови до толку посакуваната титула, во Солун очекувано направија глупост.
Во неделата вечер требаше да се одигра дербито ПАОК - Олимпијакос во Солун, но мечот го прекинале поради тоа што гостинскиот тренер Оскар Гарсија бил погоден со ролна за фискална сметка во лицето, се пожалил на расекотина и го однеле во болница.
„Дојдоа овде со цел да не го одиграат мечот. Нè провоцираат веќе 30 години“, бесно изреагирал Кирјакос Кирјакос од управата на ПАОК.
Главниот судија и делегатот го одложиле мечот на два и пол часа, а кога информацијата стигнала до трибините почнал хаосот. Навивачите на ПАОК беснееле на стадионот и надвор од него. Се судриле со полицијата и направиле огромна материјална штета. Некои од нив отишле дури и до болницата каде барале од лекарите извештај за состојбата на тренерот на Олимпијакос.
На ПАОК сега му се заканува мечот да биде службено регистриран во корист на Олимпијакос (0:3), парична казна од 90.000 евра и два меча без присуство на публика.
На улиците на Солун имало нереди цела вечер:
