Фактички Португалците го добија Велс со неговото оружје. Му препуштија на противникот иницијатива и чекаа негови грешки со организиран притисок на средината од теренот како што избраниците на Колман играа против Белгија. Велс не знаеше што да прави со иницијативата затоа што ретко се во таква положба и набрзо паднаа во игра. Сите приоди кон голот беа затворени, а без Ремзи проблемите во позициониот напад беа видливи со голо око.
Португалија игра бавно, поспано и досадно, но тоа носи резултат и никој со прст не може да покаже кон селекторот кој сите ривали ги доби со нивни оружја.
Дружината на Сантош набрзина во второто полувреме даде два гола. Прво Роналдо, кој ја натскока цела велшка одбрана, а потоа Нани кој само го смени правецот на шутот на Роналдо за 2:0.
Впечатлив момент дека Сантош го тепаше Колман со негово оружје беше вториот гол, затоа што Португалците после водството не застанаа и брзо дадоа втор гол. Полуфиналето синоќа беше првиот меч кој Ибериските староседелци го добија во основното време. Оваа селекција по многу нешта наликува на француската од 2006. година.
Триколорите пред 10 години играа нејасно во групата, пројдоа во осминафиналето и на крај стигнаа до финалето. Роналдо на овој турнир личи на Зидан од 2006. Не беше во најдобра физичка форма, но игра рационално, не претерува со топката и верува во своите партнери.
Но за разлика од Зидан тогаш, Роналдо сега има добар тренер со кој за првпат може да освои нешто со својата репрезентација.
И покрај тоа што во составот освен Роналдо, Пепе и Нани нема познати играчи, Фернандо Сантош успеа да го одведе својот тим до финалето. Тој е правиот Х-фактор како што викаат во НБА. Ако ги погледнете сите негови постапки, имаат одредена логика и доследност.
Во финалето ќе му треба и среќа, во спротивно ќе имаат тешки маки.
