644 пати Меси

Неговиот подвиг е недостижен, барем во скоро време и за да успее некој да го повтори треба да дава во просек по 43 гола, ама 15 сезони по ред за еден ист клуб. Ете тоа е границата која ја постави овој чудесен фудбалер.

Веројатно не можеме да си дозволиме да констатираме дека Лионел Меси сезонава игра со помалку жар. Синоќа Барселона го совлада Ваљадолид со 0:3, а Меси учествуваше во сите три погодоци, со гол, асистенција и клучно додавање во негов стил.

Историјата постои за некој да ја испише, а тоа го можат само најдобрите. Онаа за која денеска пишуваат сите му припаѓаше на Пеле половина век. Сега му припаѓа на Меси кој стана најдобар клупски стрелец во историјата.

Пеле држеше рекордна бројка од 643 гола, сите за Сантос постигнати на 665 натпревари, а Меси синоќа забетонира нов рекорд од 644 гола за Барселона постигнати на 749 средби. Пеле го постави рекордот за 19 сезони во периодот меѓу 1956-та и 1974-та година, а Меси за 17.

Кој би рекол дека ќе стигне до ваков епски подвиг кога на 1 мај 2005-та против Албасете го постигна првиот гол, оној со лоб на асистенција на Роналдињо.

„Кога почнав да играм фудбал, никогаш не помислив дека ќе срушам некој рекорд, посебно овој кој го срушив на Пеле. Можам само да им се заблагодарам на сите кои ми помогнаа, соиграчите, фамилијата, пријателите и сите кои ме поддржуваа“, напиша Меси на Инстаграм.

А да се само овие 644 гола на човекот кој 10 пати ја освои Ла Лига, 4 пати Лигата на шампионите, 6 пати Златната топка...

Неговиот предизвик на стартот на годинава изгледаше вака:

Погледнете што им правеше синоќа и каков беше неговиот придонес во сите три гола. 

23 декември 2020 - 15:35

Штета ако сте пропуштиле

Ете зошто Европа

Македонскиот Чернобил

Холивуд е полн со уплашени луѓе

„ЦРВЕНО И ЦРНО“ (збирка колумни) од Борис Дежуловиќ