И покрај тоа што пред првиот дуел од шпанскиот Суперкуп тренерите на Барселона и Реал Мадрид изјавуваа дека ова натпреварување воопшто не им е важно, фудбалерите на теренот докажаа дека Ел Класико е секогаш вистински спектакл.
Двата најголеми ривали вечерва ќе имаат нов дуел, а ова се фактите и бројките од Ел Класико историјата која датира уште од 1916-та година.
0 - Откако Мурињо е на чело на Реал Мадрид, тој нема забележано победа над Барселона во Мадрид. Два пати ја има победено Барселона, но еднаш на Камп Ноу и еднаш на Местаља во финалето на купот.
2 - Двајца фудбалери, Алекс Сонг и Лука Модриќ можат да дебитираат за своите тимови и повторно да се сретнат на теренот. Тие до сега имаат играно повеќе пат еден против друг, но во дресовите на Арсенал и Тотенхем.
4 - Кристијано Роналдо минатата недела стана првиот фудбалер на Реал Мадрид кој постигна гол на Камп Ноу на четири натпревари по ред.
7 - Меси и Дани Алвеш имаат настапено на сите седум натпревари на кои Барселона не е поразена во Мадрид.
11 - Најголемата победа ја има извојувано Реал Мадрид кога во 1943-та победи со 11:1.
12 - Вкупно 12 фудбалери од Барселона и Реал Мадрид беа дел од шпанската репрезентација на ЕУРО 2012. Жорди Алба премина во Барселона по завршувањето на првенството, а уште четворица фудбалери од составот на Шпанија во минатото имаат настапувано за еден од двата клуба.
13 - Реал Мадрид и Барселона заедно тежат 13 европски титули.
14 - Меси го израмни клупскиот рекорд на Цезар со 14 голови против Реал Мадрид.
18 - Рекордот со 18 голови на меѓусебните дуели го држи легендата на Реал Мадрид, Алфредо Ди Стефано. Зад него е Раул со 15.
33 - Вкупно 33 фудбалери играле и за двата клуба, а помеѓу нив се и Луис Енрике, Берн Шустер, Роналдо и Луис Фиго.
53 - Барселона и Реал Мадрид имаат освоено 53 од вкупно 81 шампионски титули во шпанската лига. Реал Мадрид имаат 32, а Барселона 21 трофеј. Следни се Атлетико Мадрид со 9 титули.
87 - Двете екипи имаат забележано по 87 победи во меѓусебните дуели. 46 натпревари завршиле без победник.
220 - Реал Мадрид и Барселона имаат одиграно 220 официјални натпревари. Вклучувајќи ги и пријателските и неофицијалните натпреварувања, овие две екипи одиграле 251 натпревар.
