Ако сакате да разберете колку добри глумци се НБА играчите, размислете колку добри НБА кошаркари би биле холивудвските глумци. Отприлика таа е равенката.

Имаме веќе ние на сајтов речник, ама да пробаме малку поискрено да дефинираме некои зборови. На англиската верзија најбрзо (а без врски) реагираше Сеад Џигал со македонски примери.

Брилијантно смислена реклама. Прво, пиво е машка работа (ок, познаваме и ние девојки кои сркаат како смокови, не е сега тоа поентата). Второ, ако не правиш "машки работи", што ти се случува? Пoчнуваш да личиш на жена ти. Толку, oдиме со сликите.

По победата врз Бразилецот Педро Риза, рускиот ММА фајтер Фjoдор Владимирович Емилијаненко најави дека се повлекува од рингот на кој во последниве 10 години им ја извади душата на неколку десетици ѕверови од луѓе. На проштелната борба присуствуваше и Владимир Путин а Федор рече дека се повлекува за да им се посвети на ќерките. "Последниот император" беше убедливо најдобриот, најсилниот, најфасцинантниот и најпитомиот тепач на сите времиња. Видео компилацијата од неговите превоспитувачки битки - не е за секого.

Ауди, Опел, БМВ, Мерцедес и други мозгале како ќе изгледаат нивните автомобили во 2050-та година. Ниту штрафцигер на стакло, ниту место за лакт да извадиш, ниту прикладно за некој јебодром на Водно, ниту ништо.

Сите сме го гледале "The Shining и сите сме се сереле од Џек Николсон, ама, не е само до него, туку и до хотелот. Одлична анализа како генијалниот Кјубрик го користи просторот и ентериерските аномалии да го збудали гледачот. 

Пого е музички продуцент и ремикс арстист со посебен мерак за правење миксови од звуци и реплики од филмови. Пипава работа до последен клик.

Кога излегуваш од кола, сигурен во себе, сигурен во својот кул поглед и потоа една глупа врата ќе ти ја сруши целата таа слика за секунда.

Серија згодни графички решенија за кампања на Плејбој, фино вкрстени со нивниот слоган "Задоволството е во твоите раце" (иако, најдобриот слоган евер беше "Плејбој, магазин што се чита со една рака").

Тие што се занимаваат со маркетинг ќе видат како изгледа да си искрен (или барем да изгледаш дека си искрен), тие што се занимаваат со фотографија ќе научат нешто за тоа како се фотографира храна. Плус ќе дознаете дека постои професија "стилист за храна."

Дечкото напуштил работа и тргнал во потрага по поедноставен живот. Сакал да има свој остров ама немал доволно пари да купи. Па затоа го изградил. Со палми, банани, бавча со зеленчук.... Главниот материјал за островот гледате како секојдневно заминува од контејнерите.

Одиме до еден фин њујоршки бар: шанк, лесно облечени женски, шипка, пијачки, пикадо.... Добра страна: никогаш нема да ви замириса соседна мишка. Лоша страна: не се пуши.

Најава за еден документарец посветен на група христијани кои едвај чекаат да им го свртиш другиот образ.

Денешните филмски ѕвезди и нивните оригинали од времето. Малку начекана добра поза, некаде соодветна фризура, некаде сцена што одговара, ама во основа сите се погодени.

Има луѓе што знаат Фотошоп, има луѓе што се мајстори во Фотошоп и го имаш Александар Кошелов. Почна од ништо. Клипов се слуша на гласно.

Мала збирка на работи од животот од 80-те. Генерално реклами и брендови. Само да видите колку всушност ви останале во сеќавање, за следниот пат кога ќе помислите дека рекламите џабе се вртат. За десетина години, веројатно истава статија ќе биде со банери :)

Додека го индексираше светот, Гугл ги собра и Светските чуда. Ама не само оние редовните 7, туку многу, многу повеќе. Распоредени се по тема и локација, а за секое имате водич, информации, дополнителни фотки, видеа и 3Д модели. Скоро како да сте биле таму.

Кога оваа сликарка ќе сака да побара асистент, огласот ќе има само едно барање: да сака да вари кафе. Екстра поени добиваат оние со паркинсонова.

На најдалечниот север на Канада живеат луѓе. Каде што живеат луѓе, има и продавници. Затоа што е најдалечниот север на Канада, таму ништо не се произведува и се треба да се донесе. Заради ова, се што се продава е отров скапо. Цените се од северната канадска територија - Нунавут.

Документарец за една блесаво мегаломанско семејство од САД, цртан за лик од игрица што не сака да биде таму, петката од Resident Evil, Крис Рок и Дензел Вашингтон.

Обично на деца им е интересно да одат кај некој од родителите на работа. Кога таткото е популарен Ди Џеј номиниран за Греми, таквото детско искуство добива сосема нови димензии.

Гола и боса најава: Крокодил јаде крокодилка!

Новиот модел е дебел колку екранот на четворката, целосно е проѕирен, доаѓа само во црна верзија и никогаш нема да се произведува. Најинтересно околу концептот за Ајфон 5 и видеото, е што негов автор е 17-годишен дечко.