Off Topic

Цензурата штотуку почнува, само сега ја викаат слобода

Зад нас е една деценија демонизирање на поранешниот претседател како лудак, монструм, Аца Шиптар и Аца педер, диктатор и шеф на мафијата кој нема мирно да ја предаде власта на изборите. Како сега со тоа да се прекине тукутака, преку ноќ? Не памтам вакво сладострастие во понижувањето на другите. Не памтам ни вакво отсуство на срам од најниските побуди.

Некои луѓе имаат време. И тонер.

Еден обожавател на филмската франшиза „Дина“ испечатил 240 постери со кадри од својот омилен филм и ги поставил по прецизен редослед покрај еден пат. Зошто? За кога некој ќе помине со возило покрај овој дел со одредена брзина, статичните слики покрај патот да му се спојат во течна анимација и „да му направат филм“. Океј.

Водич за пиење од Леми Килмистер

Уште во 2005 година, пејачот и фронтмен на Моторхед, Леми Килмистер, во интервју даде неколку тешко стекнати совети за пиење алкохол. Тој отсекогаш важеше за исклучително веродостоен извор по ова прашање. Има тука неколку интересени цаки.

Новиот српски парламент има пратеник со боенка

Во новиот состав на парламентот на Србија има осум глумци, пола од кај студентите, пола од кај Вучиќ. Еден од кај студентите е и актерот Бојан Димитријевиќ, познат како наркоманот Пикац од серијата „Вратиће се роде“. На првиот ден на новата работа земал боенка, за кога ќе му биде досадно. Симпатично, ако човек заборави дека се колнеа како 24/7 неуморно ќе се борат со криминалниот октопод на претходната власт.

„Подобрата Србија“ демонстрира простаклук

Група победнички бадијалџии се собраа пред зградата на српскиот парламентг каде се одржува конститутивна седница на новиот парламентарен состав. За да им аплаудираат на своите и да викаат „уаа“ на другите (јаки потези, јаки герили). Најглупата меѓу нив ја потури со јогурт по глава актерката Лидија Вукиќевиќ која има мандат од СНС.

ВИ музиката ги доби своите Греми

Во Лос Анџелес биле одржани првите AI Music Awards за музика креирана со вештачка интелигенција. Распоредени во 25 музички жанра и три категории: скроз ВИ, делумно ВИ и хибридни песни во кои вокалот е на клониран човечки глас. Влез за настанот бил 250 долари. Ги имаме победниците. Некако ни немаат душа :)

Додека лектирата не нè раздели

Некои плачат кога мораат да читаат, други кога книгата ќе заврши. Малиов е од вториве, барем засега, додека долгата рака на задолжителната литература не му ги пресуши солзите.

Алцхајмер, бабо, Алцхајмер

Австралиска кампања за печат, за кревање свесност околу Алцхајмер.

Една е мајка

А на мајка ниту и е гајле колкав е тој што те закача, ниту што е, ниту кој е со него. Па дури и мајката да е мачка.

Ок, готово, крај, и никогаш, никогаш, повеќе

Ако не пиеш ќе копаш, ако копаш ќе имаш пари, ако имаш пари ќе те сакаат жена ти и децата, ако те сакаат жена ти и децата ќе држиш говори. Не дека работите не се развиле и во спротивен правец.

Софтверот кој го сконта Ван Гог

Го следиме ние Deep Mind уште од мал, кога сам учеше да игра игрици. Сега е во фаза во која може да ви ван-гогизира која било фотографија од вашиот приватен албум.

 

Девојче, не е точакот за тоа

И ти знаеш да возиш точак, и она знае да вози точак. Ама не е истото.

Поглед од станот од 95 милиони долари

Њујорк > Парк авенија > 423 > пентхаус > тоалет. Е ова е погледот баш од овој конкретен тоалет.

Беше келнерка, јасно?

Во фолдерот "глупо до генијалност" го ставаме хитот od 80-те години на групата Human League во верзија во која целата песна "Don't you want mе" е сведена на еден единствен стих. 

Сем Вакнин: Јас, психопат

Од богаташ до пропаднат богаташ, од корпоративен криминалец до советник во македонски влади. Сeм Вакнин, по сопствено признание е психопат. Без совест, сочувство, емпатија, освен оние што мачките ја имаат за глувците. Егзибионистички тргнува да ги истражува своите демони и да види што мислат експертите за неговата дијагноза. Патем, ќе откриете и зошто сака да живее во Скопје. 

Флејтата што го уби Вангелис

"Во негова уста, секоја флејта би била убојита", би помислил Његош кога би чул како се масакрира една од најубавите филмски композици на сите времиња, онаа од Огнените кочии.

Марамчињата што живот значат

Во некој дел од својот живот тие запишале филмска академија или некоја актерска школа, дебатирале за финесите кај Станиславски, се замислувале како суверено доминираат на некоја театарска сцена или ја фасцинираат филмската камера во некој незаборавлив емотивен кадар.... Неколку години подоцна, јеби га, доаѓа време да се работи.

Џон Оливер лекции по географија

Меѓу работите кои годинава ги научивме од Џон Оливер, е и дека немаме поим која држава каде се наоѓа на Земјава. Фала ти Гугл.

И ти си Усеин Болт

QWOP е игра со која можете да ги остварите своите најиспотени атлетски сништа. Само прво ќе треба да научите неколку основни чекори а притоа да совладате само 4 копчиња. Можете вие тоа! Со среќа и нека ветрот биде со вас.

Како грациозно да старееш

Најдобриот збир на совети што денес ќе ги добиеш. Видеото тргнува од таму дека што и да ти се случува, тоа веќе му се случило некому. Почекајте го стариот да ви ја каже главната поента.

На старите им се може

Во бар влегува човек со мајмун. Не знам како одеше после вицот ама...

 

Ова се вашите вести од економијата

Нивниот проблем е што сите новински репортажи на вести им изгледаат идентично, со востановени ТВ трикови, графики и пози. Нашиот проблем е што се стремиме да го имаме нивниот проблем и никако не успеваме.

Арт малер на колото

Се сопна и со пијачка во рака се збрца во слика од Паоло Порпора од 17-от век, проценета на 1,5 милиони долари. Кошмар за сите.

Џон Стујарт во кечери, ден втор

Ок, сè знаеме за кечери, сè знаете за кечери. Ама пак има еден дел од времето кој почнува од моментот кога го креваат Џон Стујарт на рамо и трае се додека не го треснат од патос, во кој забораваш сè што знаеш и како мало дете го гледаш паднатиот херој и вистински веруваш во неговата болка.

Старецот и планината

Во 1959-та, умира сопругата на Дасрату Манџиј, индиски рудар од најниска каста. Жената умира откако се повредува и не може да стигне на време на доктор. Главна пречка во тоа е една планина во нејзиното родно место. По ова, Манџиј секој ден со чекан, длето и метална шипка ја копа планината и се обидува да ја пробие. По 22 години, со истиот овој алат и упорност, тој успева да направи прооден пат низ планината. Сега Боливуд сними и филм за него.

Првиот ден на училиште на холандската принцеза

Пред да почнеме со предрасуди треба да се има предвид дека Принцезата Амалија е 11-годишната ќерка и првородено дете на актуелниот холандски крал Вилем Александер, и дека таа ќе биде негова наследничка холандскиот трон. Следствено на тоа е и целиот стил на живот што го има, вклучително и тргнувањето и помпата поврзана со првиот училишен ден за годинава.

Карате кид лекција по спинување

Теми за размислување по гледање на клипот:

- Улогата на човекот кој ја раскажува приказната и неговиот агол.

- Дали Карате кид и новото дете што доаѓа да решава проблем во туѓ град се основата на американската геополитика во последниве 30 години, во која САД генерално ги решаваат проблемите со интервенирање на туѓа почва?

- Можно ли е толку да сме биле заслепени и да не сфатиме дека Даниел е негативецот, а не тој плавиот?

- Дали Мијаги има демонски моќи?