Иако последните педесет години беа обележани со идеалот на чисто лице, тоа е всушност исклучок во историјата. Според еден популарен блог посветен на брадите, човештвото досега минало низ четири големи „бранови“: во вториот век, во средниот век, во ренесансата и во доцниот 19 век. Се смета дека денес го живееме петтиот.
Историјата нуди богата галерија на брадати фигури: од Хенри VIII и Шекспир до Мојсеј. Сликарот Антони ван Дајк дури инспирирал стил на брада што го носи неговото име. Подоцна доаѓаат и Линколн, Маркс и Дарвин - имиња што покажуваат дека брадата секогаш носела тежина. Но нејзиното значење се менувало со времето - во одредени епохи претставувала сила и зрелост, а во 1960-тите и 70-тите станала симбол на отпор и индивидуалност - бунт против општествените правила и корпоративната строгост.
Со појавата на Волстрит во 1980-тите, перцепцијата се менува. Брадите се сметаат за „сомнителни“, а мазно избриченото лице станува синоним за доверба и професионализам. Одеднаш, брадите беа резервирани за академици, планинари и старци.
Денес трендот повторно се врти - градоначалникот на Њујорк гордо носи и брада и мустаќи. Њујорк Јенкис ја изменија својата строга политика и дозволија влакна на лицето, се разбира, „добро одржувани“. Дизни, кои уште од 1950-тите ги забрануваа брадите кај своите вработени, го укинаа правилото уште во 2012 година.
На почетокот, ваквите промени се толкуваа како дел од широка културна еволуција - како начин индивидуалноста да добие простор и израз. Но современата брада, според критичарите, има подлабок корен. Таа станува дел од пошироката расправа за машкоста и за улогата на мажот во модерното општество. Брадата - тој највидлив симбол на тестостерон - повторно се користи како изјава, како знаме на идентитет.
Сепак, токму нејзината популарност ја поткопува нејзината симболика. Како што забележува новинарот Џејкоб Галагер, познат по својата „вечна еднодневна брада“, кога секој изгледа исто - ништо повеќе не изгледа моќно. Брадата, велат критичарите, станува клише. А кога нешто ќе стане клише, времето веќе работи во корист на следниот тренд.
