Без разлика дали се работи за седум часа сон секоја вечер или утринско џогирање пред работа, конзистентноста одамна се смета за клучен дел од здравите навики. Сега, ново истражување сугерира дека токму стабилниот дневен ритам - кога одмараме, кога сме активни и колку редовно го правиме тоа - можеби има врска и со самото темпо на стареење.
Веќе се знае дека сонот влијае врз многу процеси што природно се менуваат со возраста: когнитивните способности, метаболизмот, регенерацијата на клетките и општото функционирање на телото. Недостатокот на одмор, пак, со години се поврзува со повисок ризик од хронични заболувања и побрзо биолошко стареење.
Во новата студија, научниците анализирале податоци од 207 возрасни лица вклучени во долгорочен истражувачки проект што следи здравствени параметри со децении. Испитаниците носеле смарт-уред седум дена по ред, преку кој се следеле нивните шеми на одмор и физичка активност. Тие податоци потоа биле споредени со претходно земени крвни анализи.
Фокусот бил ставен на таканаречените „епигенетски часовници“ - биолошки маркери што преку промени во ДНК можат да дадат проценка за биолошката возраст на телото. Таа возраст не секогаш се совпаѓа со тоа колку родендени сме имале: некој може хронолошки да има 50 години, а биолошки да старее побавно или побрзо.
Резултатите покажале дека луѓето со поредовен ритам на одмор и активност имале тенденција да покажуваат „помлада“ биолошка возраст на два од четирите епигенетски часовници што биле анализирани. Кај другите два, исто така постоела врска, но не доволно силна за научниците да ја сметаат за статистички значајна.
Истражувањето сè уште не нуди конечни одговори. Не може со сигурност да се каже дали стабилниот ритам директно го забавува стареењето, или пак луѓето што генерално се поздрави полесно одржуваат рутина. Но за научната заедница, резултатите се доволно интригантни за да отворат нови прашања: дали со мали интервенции во секојдневниот ритам - поредовно легнување, повеќе движење, помалку хаотични распореди - навистина може да се влијае врз биолошкото стареење.
