Една од клучните мерки во законот е воведувањето на минимално растојание од 500 метри помеѓу коцкарниците и училиштата. Ова опфаќа казина, автомат-клубови, обложувачници и објекти со електронски игри на среќа. Во обложувачниците што се наоѓаат во радиус до 500 метри од училишта ќе биде забрането поставување видеолотариски терминали и друга електронска опрема за коцкање.

Се забранува и рекламирање преку познати личности и содржини насочени кон малолетници како рекламирање надвор од деловните простории ако тоа има цел да ги поттикне граѓаните да учествуваат во коцкање.

Се забрануваат пораки што го претставуваат коцкањето како пат до финансиски успех и рекламирање што ветува подобар живот или решение за лични и социјални проблеми.

Досега се затворени 358 нелегални странски онлајн платформи за коцкање. Станува збор за платформи кои функционирале без лиценца, без контрола и без никаква заштита за граѓаните. 

Анализа на Институтот за јавно здравје, објавена во декември 2025 година, покажа дека 25% од учениците се коцкале во последните 12 месеци, пренесува Дојче Веле.