- Српскиот претседател Александар Вучиќ нема да учествува на самитот ЕУ – Западен Балкан во знак на протест поради тоа што Брисел не го признава напредокот на Србија.
- „Првпат во изминатите 13 или 14 година ни јас ни никој друг нема да одиме на таа меѓувладина конференција. Никој нема да ја претставува Србија, па така Западен Балкан ќе биде без Србија... Верувам дека со ова ја штитам Србија и нејзините интереси, затоа што мораме да покажеме што сè направивме, а направивме многу“, изјави Вучиќ.
- Србија доби статус на кандидат за членство во ЕУ во 2012 година. Бавно напредуваше во преговорите и запре по 2021 година. Министерот за европски интеграции Немања Старовиќ ја обвини ЕУ дека нема желба да ги признае реформите и напредокот на Србија во пристапниот процес.
- „Таа порака (од ЕУ) само ги подгрева антиевропските наративи и ги обесхрабрува оние што ги спроведуваат реформите во општеството. Отсуството на Србија ги брани достоинството на граѓаните и интегритетот на пристапниот процес, како и кредибилитетот на европската идеја во Србија“, изјави Старовиќ.
- Опозицијата ја критикува одлуката на Вучиќ како „емотивна уцена“ поради разочарувањето дека Албанија и Црна Гора напредувале повеќе и веројатно ќе станат новите членки на ЕУ.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
