Вести › Набрзинка

Во четирите најголеми приватни клиники, луѓето лани оставиле 80 милиони евра

26 јуни 2023

Директно, или преку здравствениот придонес во Фондот за здравствено осигурување за третмани што тој ги покрива, граѓаните минатата година оставиле 80 милиони евра во „Аџибадем Систина“, „Жан Митрев клиника“, „Ремедика“ и „Неуромедика“.
„Систина“ остварила приход од 50,6 милиони евра, „Жан Митрев“ 19,6 милиони евра, „Ремедика“ инкасирала 8,8 милиони евра а „Неуромедика“ – 951 илјади евра.
Во време на пандемијата приватните клиники извадија ценовници од кои боли глава. Јавноста бурно реагираше, а здравствените власти не ставија ред, иако можеа.

извор

Ако е бал, нека е МАГА бал

1 август 2025

Доналд Трамп најави изградба на огромна и луксузна сала за бал од 200 милиони долари во склоп на Белата куќа. Изградбата ќе почне во септември и се очекува првиот бал да биде организиран пред да му заврши мандатот.
Салата ќе биде одвоен објект од 8.600 квадратни метри со капацитет да прими 650 гости. Надворешноста ќе се вклопи во архитектонски стил на Белата куќа, а ентериерот ќе има позлатени елементи и скапи лустери.
Салата од 200 милиони долари ќе ја финансираат Трамп лично и донатори. Проектот ѝ е доделен на вашингтонската куќа McCrery Architects, за градежните работи е ангажирана Clark Construction, а за опремувањето AECOM.
„Повеќе од 150 години сакаа сала за бал во Белата куќа. Никогаш немало претседател што се нафатил. Јас сум добар за градење. Ќе ја изградиме брзо. Ќе биде прекрасна, врвна... Тоа ќе биде моето наследство“, изјави Трамп.
Тој уште во 2016 година, во времето на Барак Обама, понуди да плати 100 милиони долари за изградба на сала за бал. Обама го одби.

извор

Словенија прва во ЕУ воведе ембарго за оружје за Израел

1 август 2025

Словенија стана првата европска земја што воведе забрана за извоз, увоз и транзит на оружје за Израел, поради уништувањето на Газа и изгладнувањето на Палестинците.
Премиерот Роберт Голоб објави дека владата разгледува и други мерки против израелската влада поради „сериозни нарушувања на меѓународното хуманитарно право“.
„Премиерот јасно кажа дека Словенија ќе дејствува независно ако ЕУ не може да усвои конкретни мерки. Поради неединство ЕУ не ја исполнува оваа задача. Резултатот е срамен. Луѓе во Газа умираат бидејќи систематски е блокирано доставувањето хуманитарна помош. Умираат под урнатини, без пристап до вода, храна и основна медицинска грижа. Ова е целосно запирање на хуманитарен пристап и намерно спречување на основните услови за преживување. Во таква ситуација, должност на секоја одговорна држава е да дејствува, дури и ако тоа значи еден чекор пред другите“, објави владата.
Словенија лани во јуни ја призна Палестина и упорно повикува на прекин на огнот во Газа и на засилено доставување храна и хуманитарна помош за Палестинците.
Пред две недели воведе санкции и им забрани пристап на двајцата најекстремни министри во владата - Безалел Смотрич и Итамар Бен-Гвир.

извор