Вести › Набрзинка

Венецуела под целосна нафтена блокада

17 декември 2025

Американскиот претседател Доналд Трамп објави целосна блокада на танкери за нафта што патуваат до и од Венецуела, зголемувајќи го финансискиот и воениот притисок врз владата на Николас Мадуро.
„Венецуела е целосно опкружена со најголемата армада некогаш составена во историјата на Јужна Америка... Притисокот ќе продолжи сè додека Венецуела не им ги врати на САД нафтата, земјиштето и другите средства што ни ги украдоа“, порача Трамп. Претходникот на Мадуро, Уго Чавез, ги експроприра средствата на американските нафтени компании во Венецуела.

Минатата недела, американски сили извршија десант близу брегот на Венецуела и запленија танкер со нафта. Блокадата за извоз на нафта, кое во ноември надмина 900.000 барели дневно, би имала катастрофални последици врз економијата на Венецуела. На списокот на САД има 55 танкери што редовно пловат до венецуелски пристаништа.
Американските сили во изминатите три месеци извршија и 25 ракетни напади во карипските води врз бродови за кои тврдат дека носеле дрога во САД. Притоа загинаа најмалку 95 луѓе. Трамп постојано се заканува со напади и на копно против картелите, кои ги поврзува со Мадуро.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор