- Европската комисија постапила незаконски кога одбила да ги објави текстуалните пораки што претседателката Урсула фон дер Лејен ги разменувала со директорот на „Фајзер“, Алекс Бурла во врска со купувањето вакцини за ковид, пресуди Врховниот суд на ЕУ.
- „Комисијата не може да тврди дека не ги поседува документите што ги побарале новинарите без да даде веродостојни објаснувања, кои на јавноста ќе ѝ овозможат да разбере зошто тие документи не може да се пронајдат“, наведува Судот.
- Њујорк тајмс, кој ја покрена тужбата, поднел релевантни и доследни докази што укажуваат на постоење на текстуални пораки помеѓу претседателката на Комисијата и генералниот директор на „Фајзер“ во врска со набавката на вакцини. Весникот дознал за пораките во 2021 година при интервју со Бурла. Кога ѝ биле побарани документите, Европската комисија одговорила дека „не е во состојба да ги обезбеди“.
- Пресудата е сериозен политички удар за Урсула фон дер Лејен, која и порано беше критикувана дека ја задушува транспарентноста во извршното тело на ЕУ.
- „Ова е голем поен за транспарентноста. Луѓето сакаат и имаат право да знаат како се донесуваат одлуки. Тоа е суштинско во демократијата. Дури и кога се прави и со СМС-порака“, изјави холандската европратеничка Ракеле Гарсија Хермида ван дер Вале.
- Лиридона Вејсели Тафили, беше осудена во Основниот суд во Гостивар на парична казна од 700 евра, односно 43.000 денари, за кривично дело „злоупотреба на лични податоци“.
- Пресудата се однесува на новинарски прилог објавен на социјалната мрежа ТикТок, во кој таа го навела името и презимето на судија од Основниот суд во Тетово.
- „Осудена сум од Основниот суд во Гостивар со 700 евра казна за изнесување лични податоци, затоа што при известувањето за една тема што ја обработував го спомнав името на судијата Назиф Илјази од Основниот суд во Тетово. Станува збор за случај во кој возрасно лице уценувало малолетник, му испраќало порнографски материјали и му се заканувало, а судијата му изрече казна од три месеци ефективен затвор“, изјави Вејсели Тафили за случајот за кој е осудена.
- Судијката која ја осудила Лиридона се вика МАГДАЛЕНА МИШОСКА.
- Германскиот канцелар Фридрих Мерц го отфрли предлогот за создавање заеднички европски воени сили, кои би имале улога во повоена мировна мисија во Украина.
- Манфред Вебер, лидер на Европска народна партија, предложи формирање единствени европски воени сили и спојување на водечките функции во Европскиот совет и Европската комисија во единствена позиција, со многу поголема извршна моќ.
- Мерц ги поздрави напорите за реорганизација на ЕУ, но рече дека идеите што ги спомнал Вебер не се решенија за итните проблеми на Европа - подобрувањето на одбранбените капацитети и на ослабената индустриска конкурентност.
- „Треба да поставуваме прашања како да ја направиме Европа помоќна и пообединета и за тоа треба да се дискутира, но сега мораме да се фокусираме на задачите што се пред нас во овој момент“, изјави Мерц.
