- Претседателот Доналд Трамп објави царини од 10% до 12,5% за повеќе од 80 земји, за да ги заменат досегашните царини од 10% кои имаа привремен карактер и истекуваа денеска.
- Новите царини стапија на сила веднаш. Покриваат земји што учествуваат со вкупно 99,4% од американскиот увоз.
- Трамп се повика на друга законска одредба за новите царини – „мерка против земји што спроведуваат неоправдани, неразумни или дискриминаторски трговски практики“ - за да не може да бидат поништени од Врховниот суд како претходните.
- Со новите царини се опфатени најголемите трговски партнери на САД - сите членки на Европската Унија, Британија, Канада, Мексико, Кина, Индија и Австралија. Остануваат на сила и сите други дополнителни царини воведени на разна основа и за специфични сектори.
- Македонија не е засегната со новите царините, затоа што во февруари склучи билатерален договор со САД. Македонија ги укина сите давачки за американски индустриски и земјоделски стоки, а САД задржаа царина од 15% за македонски производи.
- Силите на НАТО на Косово почнаа постепено ѝ го предаваат на локалната и на меѓународната полиција обезбедувањето на две критични локации – српскиот манастир Дечани и главниот мост на реката Ибар во Митровица.
- КФОР објави дека трупите ќе задржат видливо присуство на двете страни на Митровица и низ северот на Косово. Персоналот ќе биде распореден за да реагира итно на какво било влошување на безбедносната ситуација.
- Процесот ќе биде постепен и координиран со косовските институции, косовската полиција, ЕУЛЕКС и други меѓународни актери.
- Српска листа, најголемата српска политичка партија во Косово, остро се спротивстави на какво било намалување на присуството на КФОР кај мостот во Митровица и побара итна средба со командантот на трупите генералот Озкан Улуташ.
- Иран наскоро ќе ѝ се приклучи на Новата банка за развој на блокот БРИКС, што на Техеран ќе му отвори нов канал за финансирање на развојот, надвор од системот во кој доминираат западните земји.
- Иран, кој со децении трпи тешки американски и меѓународни санкции, пред две години стана полноправна членка на БРИКС, економско-политичкиот сојуз формиран од Бразил, Русија, Индија, Кина и Јужна Африка.
- Една од главните цели на БРИКС е да ја намали зависноста на членките од американскиот долар преку поттикнување на трговија и финансиски трансакции во нивните национални валути.
- Иран се залага за билатерални порамнувања во локални валути, па дури и за воведување единствена валута на БРИКС. Новите чекори кон дедоларизација опфаќаат поединечни аранжмани – како што се плаќањата во јуани за трговија со нафта и гас, и напорите на Русија и Иран за поврзување на нивните банкарски системи.
